翁虹和任職大西洋城某賭場總裁Gary將於下月六日閃電結婚。不知翁虹是否趕辦嫁妝，日前她便趁空檔，在上海瘋狂購物。
翁虹將於下月六日和任職美國大西洋城某賭場亞洲區行政總裁、現年三十八歲的美籍華人伍偉傑（Gary）在美國新澤西州國際豪華大酒店結婚，昨日記者聯絡上身在北京拍廣告的翁虹，她透露和男友拍拖並答應下嫁，是一段沙士情緣所賜。
翁虹說：「我今年二月去大西洋城做騷，識咗Gary，佢請過我食飯，但只係好普通嘅見面。後來我哋有用e-mail同電話溝通，而喺沙士期間，佢不顧屋企人嘅反對，好有誠意咁飛過嚟香港追我，我哋先至開始交往。但經過之前嗰段感情經歷（指和日籍未婚夫迫田正己的一段情），我決定將感情事低調處理。」
翁虹這半年來一直在內地拍劇，今次突然結婚，確實叫人愕然，對此翁虹回應說：「多謝大家咁關心我，我其實同大家一樣，睇報紙先知有個婚禮等緊我，之前我確實答應咗佢嘅求婚，佢專程過嚟探我班，揸咗十幾個鐘頭車，都幾令人感動，但我冇諗過婚禮嚟得咁快，我本來plan咗十二月同佢去美國度假，估唔到佢咁鬼馬同我屋企人秘密籌備咗婚禮，我連喜帖都未見過，真係令到我既驚喜又詫異。」
翁虹雖近幾個月來不見天日埋首在上海拍劇，但得到愛情滋潤的她，心情特別靚，大前日她便趁空檔，在淮海中路瘋狂購物，短短兩個小時，就消費了三萬多元。
翁虹先去Swarovski水晶舖買了萬多元水晶，當中包括一頂五千多元的皇冠形狀飾物，另外又買了三千多元的手表和千多元的手鏈。之後再去飾物店FolliFollie買了一萬元的鑽石耳環和戒指，又在意大利品牌時裝店Fornarina買了一萬元衣服，不知是否為結婚準備嫁妝？
記者何國豪、黃文偉上海直擊
