近年興玩野外活動，一到假日，男男女女都揹起成十斤重裝備行山、攀石，好明顯因為呢股熱潮，戶外用品專門店愈開愈多，其中TheOverlander更喺旺角一幢商業大廈開咗間3,000呎旗艦店，話明係旗艦店，當然同尖沙嘴、沙田2間分店唔同，新舖有得玩有得買，今日就帶你走一轉，以後入貨要知碇喇。
記者：黃婉冰 攝影：梁細權
模特兒：Angel（SunSpot）
新款Shaster容量有80公升，啱晒露營用，支架以做飛機嘅鋁合金製成，既輕且硬、承托力高，有大、中、細3個Size選擇，以配合不同高度同身形。
專為劇烈運動而設計嘅AdventPro，布料超薄，外層加1層矽，重量特輕又夠堅韌，同樣有自動調校式背帶系統，背囊下層有多個出水孔，有助濕身衣物快速乾透。
Goretex質料，全褸有5條特長防水拉鏈，腋下位置佔2條，提高透氣度；肩膊位用彈性質料，方便雙臂大幅度郁動，另有多色選擇。
用3M保暖纖維質料製成，比傳統保暖棉質料來得薄且輕外，同時重用埋自家研製Dry-Tec防水料，透氣同防水度拍得住Goretex，但價錢就經濟得多，旅行滑雪必備Item。
一般Fleece濕水即刻失去保暖效果，但ZEROPOINT呢件背心褸就用一種叫Climapro嘅特製Fleece，即使濕水依然保暖，兼有防風功能。
一般蒙古包營幕受力點喺頂部，未必經得起風吹雨打，呢款MSR營幕經改良後，改以3支營柱組成嘅雙三腳架式設計，更堅固兼可承受極高風速，支架鋁合金製，既輕且有彈性，而以連續式營柱套管代替傳統嘅膠圈接承，可免以往經常出現嘅膠圈爆裂情況，上雪山都無有怕。
普通爐只可以用白電油，但XGK野外爐可以燃燒唔同液態燃料，好似白電油、火水、柴油、油渣等燃料，十字形爐架易拆易安裝，最適合登山、露營時使用。
店舖盡頭特設一幅13呎乘9呎嘅迷你攀石牆，攀石發燒友可以隨時過吓手癮，免費大顯身手，初哥唔識玩？有專人在場指導，就算唔識爬都唔緊要。
2個書櫃放滿各種野外活動嘅雜誌同書籍，免費提供給客人閱讀，有如一個小型資料館，搵料夠晒方便。
TheOverlander
電話：21171810
地址：旺角彌敦道610號荷李活商業中心12樓17至23室
營業時間：星期一至六11:30am至7:30pm，星期日11:30am至9:00pm。