澳門格蘭披治大賽車花絮

雙座3級方程式冇癮
金禧賽車踏入重頭戲，精采賽事接踵而來，車迷睇得高興之餘，又有機會被抽中乘坐雙座位三級方程式繞東望洋賽道一圈；不過，就有幸運兒投訴，難得可以坐架快到識飛嘅戰車，偏偏負責駕駛嘅車手就住就住，同佢自己平時遊車河無分別，覺得可惜咁話。

詹家圖貪睡險甩拖
噚日亞洲雷諾方程式賽車大戰一觸即發，不過各車手準備摩拳擦掌之際，偏偏唔見28號車手詹家圖，原來呢位車神之子唔知醒，最後要由工作人員打電話畀佢先起身，好彩澳門地方細，一陣間「打的」就可以到達，着埋成套車手裝備重趕得切鬥車。

「氹仔」浸F1
一級方程式車示範果然非同凡響，噚日嘅圈速就可以去到一分五十五秒幾，快三級方程式二十幾秒。正當車手費文享受每圈打破紀錄嘅時候，突然間呢架鮮黃色佐敦戰車係葡京彎打白鴿轉，各車迷喝倒采時，番睇慢鏡重播原來先發現葡京彎前竟然有「氹」水，架F1跣胎先至出事。