上星期個市都重係上上落落，但千祈唔好以為個市會好安全咁橫行落去，話唔定有朝起身美股唔見二百零點，班大戶就會手起刀落。
上個星期國內信息產業部突然公布國內網間互聯結算及中繼費嘅分攤方法，雖然有報道話新結算收費下，國內固網大哥中國電信（728）會有唔少收入流咗去中移動（941）同聯通（762），令到中電信未來收益大為減少。不過班大戶就唔係咁諗，有個專睇電訊股嘅「芬佬」朋友同伏勝講，話就算呢單嘢對中電信有「長遠」影響，但影響範圍有限，加埋中電信仍然係國內固網一哥，唔似移動電訊市場咁，兩間公司打個你死我活。
所以，呢個朋友話唔會因為呢單嘢而改變對中電信前景嘅睇法，相反，因為聯通喺重慶開始單向收費，重有可能推廣到CDMA網絡，中移動分分鐘會作出反擊，喺兩雄相鬥下，揸住中電信分分鐘除笨有精。
之前借住新股必升嘅勢頭來港上市嘅中航科工（2357），喺1.6元樓下浮浮沉沉咗個多禮拜後，終於喺上星期升番上去個六樓上，有朋友話要留意呢隻股票。除咗之前唱過有機會入選國企股指數成份股外，最重要重係隻股票喺上市時已經有幾個大孖沙入咗股，變相令到街貨唔係好多，喺過去個幾禮拜回落期內，班大戶喺試過個低位無乜沽壓後，打算短期內再次開車，目標價話會係個八左右，如果各位短期無乜心水嘅話，不妨喺隻股再次跌穿個六時入番少少。
伏勝