特首董建華統治下嘅香港家陣立立亂，笑話醜聞一單接一單。噚日喺外國記者會舉行咗一個討論○七年特首選舉嘅論壇，除咗立法會議員李柱銘、余若薇、吳靄儀、大律師梁家傑、李志喜同幾位學者，連近來避記者如避蛇蠍嘅平機會前主席胡紅玉都拖埋老公秦家聰出席，重有陸恭蕙㖭。
單係睇有咁多重量級人馬出席，就知大家有幾咁關心下屆特首點選。難得嘅係，政制事務局局長林瑞麟同民建聯主席曾鈺成都不惜犯險「深入虎穴」齊齊討論。
林瑞麟嘅演詞講到天花亂墜，唔知道香港發生過7.1大遊行嘅人，單係聽佢講，實係以為港府非常支持民主，但余若薇後來不斷追問，林瑞麟都答唔出幾時先出到政改諮詢文件，重俾李柱銘捉住佢演詞中嘅一句話，開咗阿董一個小小玩笑。
事關林瑞麟解釋，第二屆特首選舉規定，有政黨背景嘅當選者要退黨，係為咗令特首超然於政黨嘅限制之上。馬丁即刻笑話，講超然，又唔見阿董聲勢似隻飛鷹咁超然高飛，𠵱家反而有啲似元朗山貝河隻小鱷魚，沉咗落河底。
曾鈺成唔想俾民主派圍攻，一上場就自認係民主派，睇嚟「民主」個招牌都幾好使，不過講講吓，佢又話選舉點都要循序漸進先適合香港。
另外，八方聽聞民主派另一位重量級人馬劉千石噚日又返咗廣州，因為佢媽媽最近患上肺炎，阿石申請咗個一次過通行證，攞埋藥返去探阿媽。
傳真︰2623-9278
電郵︰