花了兩年時間拍劇的古巨基，近月將戰線拉回香港，可惜卻耳膜受損，心情大受影響。但基仔仍奮力向奪取「最受歡迎男歌星獎」的夢想進發，他表示自知今年起步太晚，只能寄望歌曲獎，明年誓必奮力作賽，以圓夢想。
採訪：蔡如育 攝影：陳偉權
髮型：NicholYipbyHAIR 場地提供：HAIR
古巨基早前患上耳疾，因而被指影響到歌唱事業，原來基仔因戴耳機演唱時，聲量校得太大，以致耳膜短暫性受損，經醫生診斷後指基仔左耳發炎，但右耳卻無礙。
基仔日前接受本報專訪時講述經過，想起耳朵一度痛得惟恐失聰，對耳機仍猶有餘悸。他說：「早兩個月一次做騷，嗰度環境太嘈，我戴住耳機，音量一向用開五度，嗰日怕聽唔到音樂，就校到八度（最高為十度），到上台唱歌都係校咁大聲。點知唱完之後，發覺右邊耳仔聽嘢好似有層膜包住咁，好矇，諗住過兩日冇事，點知隻耳仔變得好痛，咁先識得去睇醫生。」
基仔自言小時候體弱多病常看醫生，所以長大也不喜歡看醫生，但當他發覺痛楚感覺由右耳伸延至左耳，便不得不妥協。問基仔曾否擔心會失聰，他說：「我冇諗到咁壞，最初都有少少擔心。」
基仔現在仍覺得聽覺比不上從前，他說：「醫生話做我哋呢行，聽覺會比平常人敏銳，𠵱家我少咗啲敏銳，同平常人一樣，唔會聾。但會有少少陰影，每次戴耳機都會特別小心，無論幾嘈都只會校五度，即使真係好嘈，都寧願憑經驗搭夠唱好佢。」縱然如此基仔還是堅持唱現場，他說：「我鍾意唱歌，點都要自己唱。之前我同李克勤講開，佢話好多人都係咁，係歌手嘅職業病，耳仔勞損喎，佢𠵱家睇電視都要校得比平常人大聲先聽到，咁我個心都定好多。原來歌手要保養把聲之外，耳仔都唔可以忽略。」
基仔的新碟在今個月推出，這是他簽約黃柏高（Paco）作經理人及加盟金牌唱片後的首張大碟。之前Paco聲言以讓基仔拿下「最受歡迎男歌手」作目標，問基仔是否很期待這一日？他說：「我從來做嘢都唔會計劃太遠，但Paco就好識計劃，佢幫我諗長遠嘢，我就逐步做好手頭嘅嘢，大家配合得好好。我之前從來冇諗過要幾時攞啲乜獎，但𠵱家呢個都係我目標之一，今年我八月先起步，算係熱身，想攞歌曲方面嘅獎多啲，出年先至係真正落場比賽。」
基仔花了兩年時間拍電視劇，之前在港播出的《還珠格格III天上人間》成績麻麻，他有否後悔？基仔說：「一套劇集成功要靠好多因素，呢套劇喺內地都有好成績，幫我全面打入內地市場，呢個係我好大的收穫。𠵱家好多歌手要打內地市場，要花好多心機同時間，我就無心插柳拍咗兩套劇就搞掂咗，咁有乜好後悔呢？至於香港方面，我會將重心放喺音樂上，未來兩年都會以歌唱事業為主。」
