《火炭陷阱》一文刊出後，惡佬明來電回報，「事有湊巧，你篇文一出，十一月九號星期日，入火炭工業區條天橋通道已經有工人開工填補陷阱，嗱，𠵱家冇咗暗藏ramp嘞，成條路順滑晒，行車唔會戥親。」惡佬明一收線，好耐冇聽過佢把聲嘅高佬森嘅電話就到：「喂，我睇完你篇《火炭陷阱》，一直想話畀你知，我前日喺銅鑼灣禮頓道松竹樓對開行過，幾乎仆咗街。行人路現在用階磚，階磚之間有罅隙，我唔覺意踏落去，幾乎拗柴，啲街坊話好多着高踭鞋女士喺嗰度中招PK，你去松竹樓食飯，小心睇路呀！」
嚡，全香港都唔知幾多行人陷阱，防不勝防，政府有意美化市容，將行人路重新鋪設，英泥路變成階磚路，其意本善，可惜香港啲工人時好時劣，碰啱一啲新手或者冇心機嘅，鋪設階磚時，樣樣只顧「差不多」，不求完美，監工嘅吞pot，收貨嘅側側膊，於是行人就受苦，納稅人枉花金錢。
高佬森講出嘅行人陷阱，女士特別容易中招，如果因而PK，高佬森話可唔可以告政府，要求賠償呢？香港不同美國，相信要控訴得直，並不容易。輸咗官司兼蝕埋時間、堂費，條數就計唔過。怕且因為咁，政府與建造承包商就有恃無恐。或者等到有一日，大富豪嘅千金因踏中陷阱而跣親條腰，控告政府及有關人士，咁做會逼使政府認真地對付承辦商嘞。