嚟緊下月中（18/12），最後一集《魔戒三》終於上畫，不過今個星期搶閘推出嘅係《魔戒二》四碟及五碟裝DVD珍藏版；珍貴喺邊度？今次DVD版會比大家去年喺戲院所睇嘅《魔戒二》，加長多43分鐘刪剪片段，令成個《魔戒》故事變得更完整、更忠於原著！再加埋dtsES6.1聲道超完美影音演繹，既完整又完美嘅《魔戒》世界，只可此中尋！
記者、攝影：朱崇德
1.魔戒二部曲：雙城奇謀（4碟）
2.變種特攻2
3.魔戒二部曲：雙城奇謀（5碟+石像）
4.姊魅情深
5.未來戰士3：殲滅者TX
資料提供：DVDPRO
今個星期當然係由一級大片《魔戒二部曲：雙城奇謀》跑出啦！4碟版較平，平民化啲，去貨都多啲！5碟版多隻Making公仔，賣貴$200，所以多數都係發燒人買！不過去貨都凌厲，估計短時間會斷貨。《X-MEN2》就慘啲，撞正《魔戒二》！已經俾一般DVD超賣，都係得個亞軍！另外重有隻韓片《姊魅情深》新返，似講鬼故，實講心理學，雖然並未入榜，但恐怖懸疑又夠刺激，值得一睇！
早三個月前，啱啱先出過普通單碟版《魔戒二部曲：雙城奇謀》，喺乜片段都冇追加下都賣成$150；轉個頭又話出多個4碟「豪華完整版」（$195），同5碟「豪華完整限量珍藏版」（$398）。𠵱家DVD舖內，以4碟版最搶手，差幾十蚊多三隻碟同咁多嘢睇，感覺真係好抵；而5碟版去貨亦凌厲，買家多數為發燒級碟迷，旺角有DVD舖稱，幾日間賣去過百套！須知香港限量發行只1,000套，相信有機會短時間斷貨！
舊年有去戲院睇《魔戒二》嘅人，都會覺得故事內容剪頭剪尾，好多原著內嘅劇情，都被刪剪得支離破碎！不過今次4碟同5碟版DVD，你會睇到《魔戒二》最完整嘅故事。基本兩款套裝DVD所收錄的故事內容完全一樣！除基本電影版近三個多小時的故事內容之外，還會收錄埋FANS們一直渴望嘅新增43分鐘從未曝光加長片段，跟上次一樣，加長片段更深入交代劇情的來龍去脈。
靚仔精靈箭手雷高拉同矮人金靂喺呢段會鬥邊個殺得半獸人多，金靂殺咗43個、雷高拉就殺咗42個；不過雷高拉喺金靂所殺嘅半獸人身上補一箭，咁又話平手，兩個拗數非常好笑！
戲院睇《魔戒二》嘅攻城場面，係咪覺得唔夠喉？喺今次DVD加長版，不論聖盔谷及號角堡兩幕最大的攻城戰，都會加入好多千人會戰場面，極盡震撼！
梅里、皮聘同樹人攻白袍法師塔一幕，原著在攻入城後，兩個哈比人有一段好長嘅舌戰撒魯門，佢兩個點樣誤打誤撞，將魔水晶球得到手，呢度會有詳細解釋！
碟1的特別版內，收錄有粗口版咕魯，講吓佢為拍《魔戒》點樣超時冇補水，日做夜做冇餐好食！好搞鬼！
音效表現，都係今次《魔戒二》DVD版強力賣點！基本dtsEX5.1環迴立體聲與dtsES6.1環迴立體聲，都喺碟內落齊；聽一啲發燒級玩家表示，呢隻暫時係6.1環迴立體聲最正嘅3區碟！相信一定會被捧上試機精選嘅神枱！
另外碟4同碟5，就分別收錄咗咕魯誕生、中土世界地圖、尋找遠征隊旅程的足迹、演員作戰前特訓、數碼效果全面體、製作半獸人電腦程式、美指親述設計圖片等，可以最深入角度，認識《魔戒》世界觀。
叫得5碟DVD豪華完整限量珍藏版，當然會多加好多新資料啦！除附有4DVD豪華完整版外，更附送全球限量額外的「第五隻」DVD──咕魯外傳，內容包括：CapturingMovieMemoriesDVD、Gollum"Smeagol"雕像的製作及Gollum的誕生畫冊一本，完全將這隻看起來像真實的演員（但實情是由電腦製作的數碼角色）由誕生到真身都作最詳細的解構！另外5碟版重會多送一隻原裝美國進口近7"高的咕魯雕像，絕對是FANS們的必備珍藏！
查詢電話:23326326
地址：旺角奶路臣街6E德發商場地庫B4舖
