馮仁昭早排揭露咗靚女紅星個大隻佬男友，喺中環某的士高攬女「偷食」，事後靚女紅星周圍打聽呢件事，知道真有其事之後，同大隻佬男友吵大鑊，佢兩個嘅感情真係危危乎。
靚女紅星個樣望落斯斯文文，但其實性格好火爆，而且愛面子，佢同大隻佬男友嘅戀情公開之後，雖然身邊人好多閒言閒語，但係佢都係愛情至上，完全聽唔到啲反對聲音，大隻佬走去滾，叫佢嘅面子放去邊吖？所以佢即時審問大隻佬。大隻佬呢排心情當然亦好差啦，有次馮仁昭個朋友重撞到佢飲悶酒飲到醉醺醺㖭。
馮仁昭好清楚靚女紅星嘅性格，佢係絕對唔肯同人分享男友嗰類人，睇嚟大隻佬呢排真係要醒醒定定，如果畀靚女紅星知佢重出去沙沙滾，咁佢同靚女紅星呢段感情一定冇得掹啦。
𠵱家喺浙江橫店拍攝電視劇《武當》嘅李若彤，早排佢住嘅酒店發生盜竊案，佢嘅經理人鄧小姐俾人偷咗兩部手提電話同二千幾蚊現金，噚日馮仁昭同鄧小姐通電話，佢話個賊已俾公安捉到，但係被偷嘅現金已經洗晒。捉到個賊李若彤好開心，起碼唔使再擔驚受怕，總算有覺好瞓，而鄧小姐後日（十八號）會去橫店，可能要出庭㖭。
胡杏兒今年認真係是非不絕，早排俾人話擦高層鞋，最近又俾人話佢得罪高層，搞到台慶做二打六，冇得同其他一線花旦一齊表演，噚日佢同謝君豪喺灣仔金紫荊廣場拍《彩虹橋》，胡杏兒對於最近嘅是是非非點睇呢？佢話：「一係話我巴結人，一係話我得罪人，咁咪問番本周刊，我就唔介意，咪當古仔咁睇，讀者鍾意咪得囉！」
徐若瑄噚日去咗台灣北縣二重疏洪道親水公園，現場有五千五百二十三人擁抱，破咗世界紀錄，徐若瑄喺最後一刻趕到，及時成為破紀錄嘅一分子，佢唔理男女，見人就攬，重同記者講話擁抱係表達感情最好嘅方法，徐若瑄攬人攬得咁濫，唔怪得佢成日傳緋聞，一時周杰倫，一時又吳建豪啦。
劉家輝前晚喺大學會堂出席「電影香江——功夫世家」嘅首映同研討會，佢講到演員要有充足時間休息，先會有好表現，更提起梅艷芳有病都重要拍張藝謀嘅《十面埋伏》，劉家輝話：「我覺得佢唔應該拍，身體要緊呀，搵到錢又點，冇咗健康，咁點算呢？」咁講梗係啱，但阿梅咁熱愛演藝事業，又好難要佢見到啱嘅劇本而唔心動嘅。
黃凱芹噚日喺紅館為林敏怡、林敏驄兩姊弟搞嘅「友情真經典演唱會」綵排，凱芹話林家兩姊弟喺好耐之前曾經作過歌畀佢唱，不過歌就紅唔起，就算喺演唱會再唱都冇人識，所以佢決定唱張國榮首《無心睡眠》同陳百強首經典歌《深愛著你》，有人識之餘重覺得幾有意義。我馮仁昭就覺得佢爆單咁嘅嘢出嚟，似乎喺度倒自己米喎！
葉蒨文（Sally）噚日喺九龍灣為「躍動晚年耀銀禧」擔任嘉賓，佢話明年三月就會開演唱會，順道慶祝自己入行二十五周年，講到嘉賓方面，佢話自己冇乜朋友，總之邊個想嚟佢都歡迎。Sally重話之前有導演想搵佢拍戲，不過冇拍戲咁多年會怕醜，問到佢會唔會為藝術犧牲，佢話：「暴露唔啱我，過唔到自己嗰關。」
