古巨基入行至今十二年，即使在圈中不乏異性好友如莫文蔚、周慧敏及傅明憲等，但緋聞不多，以往與女助手及內地女星黃奕的緋聞都被他堅決否認，難道基仔見盡娛圈美女，都未有一位能讓他心動？
基仔笑說：「靚唔係心動嘅原因，個個女星都有番咁上下分數，咁易心動我咪好唔得閒？
「我拍拖好講感覺，從來未試過一見鍾情，通常拍拖都係由朋友開始，我鍾意女仔樂天、鍾意笑，而笑容又燦爛，最緊要識撒嬌。但點講都係要識落慢慢有感覺，啱傾先會一齊，要遇到係好講機緣，好難講嘅。」
今年三十一歲的基仔自言父母相當開明，從未催促他結婚，基仔說：「佢哋明白做呢行嘅情況，會體諒我，呢行係晚婚。如果我屋企得一粒仔可能會心急啲，好彩我有個細佬頂住，佢結咗婚，睇佢幾時生仔繼後香燈，又再頂一頂囉。」
話雖如此，但基仔也憧憬未來結婚生子做個好爸爸，他說：「如果諗得理想啲，我會唱歌唱到四十歲，四十歲後會放多啲時間喺家庭，將事業重心轉向幕後創作，即使係幕前都係為滿足而唱。但我梗係唔會話四十歲生日話走即走啦，世事難料，以前有人問我幾時結婚，我為咗畀答案而諗個答案，但其實我真係唔知，我唔會講一個特定日期，不過我一定會結婚，因為我想要仔女，好想做爸爸。」
一直有傳因為黃柏高簽了古巨基，許志安才會離他而去。而安仔早前接受雜誌專訪時，自信滿滿地表示今時今日的他，沒必要怕一個古巨基。雖然一山不能藏二虎，但答案也未免令人覺得不夠大體，問基仔得悉後有何感覺？他說：「佢當時未必係咁講呢，可唔可以唔講呢個話題呀？我唔想有是非。」問題問了，被訪者當然有權不答，突然想起梁朝偉在《天下無又又》的對白：「我只不過係俗世間一粒微塵，天大地大，一個深呼吸，乜嘢都冇晒啦。」
