賽車快訊：第50屆澳門格蘭披治大賽車<br>東望洋房車賽三級方程車賽成焦點

賽車快訊：第50屆澳門格蘭披治大賽車
東望洋房車賽三級方程車賽成焦點

第50屆澳門格蘭披治大賽車嘅金禧盛會，今日勢將推至高潮；當中，分有兩回合共25圈比賽嘅三級方程式大賽，頭9位車手響排位賽所造出嘅時間，同樣係2分13秒，名次僅能以秒數後三位小數定斷，可預期勢必有一番龍爭虎鬥。其次，曾贏得14次冠軍嘅寶馬車隊，今年響東望洋房車賽中，終於受到考驗，皆因響早前嘅排位賽中，被改投愛快車隊嘅澳門車手古圖（AndreCouto）突圍而出，搶佔頭位出賽，而寶馬車隊則分佔第2、第4至第7位，呢場愛快147跟寶馬320i嘅角力Show，定會掀起一場惡鬥呢！

記者、攝影：陳偉林

將門之後出戰濠江
今年澳門三級方程式賽車頗為惹人注目，皆因當中嘅參賽車手，有前世界一級方程式冠軍車手羅斯保嘅兒子NicoRosberg，以及同屬冠軍車手畢奇嘅兒子NelsonPiquetJr參與，前者排位賽位列第7位，而後者則排列第13位，惟兩者所造出嘅時間，僅一秒之差。

■今日排頭位出戰三級方程式車賽嘅卡邦，勢將成眾矢之的。

歐、亞冠軍人馬聚首
今屆澳門三級方程式車賽，不乏亞洲及歐洲三級方程式冠軍人馬；其中，剛出爐嘅歐洲三級方程式錦標賽冠軍車手比斯高（RyanBriscoe），排位賽位列第2，將駕駛1號戰馬爭標。至於本年度日本三級方程式大賽冠軍郭尼（JamesCourtney），則緊隨其後，僅相距0.216秒排響第3位。而身兼雷諾車廠發展部車手嘅卡邦（FabioCarbone），雖然去年參與澳門車賽未能一舉摘冠，但響今年嘅排位賽中卻表現突出，力壓群雄下站列頭位出戰。

■維修站內眾車手蓄勢待發，瀰漫着大戰嘅緊張氣氛。

■1號車嘅比斯高能否響同年度連取兩個冠軍，車迷真係要拭目以待。

寶馬320i全接觸

■跟頭車同隊嘅拿派爾，排位賽緊守第4位，可望助卡邦力排對手。

■三級方程式嘅車手座椅屬度身倒模訂做，以求有更佳妥貼性。

東望洋房車賽　寶馬力戰愛快
東望洋房車賽，自2000年改行超級生產車（SuperProduction）賽制後，讓車迷有更佳體驗，皆因落場比賽嘅車款全屬量產型號，外形跟日常街道用車相近；而自改制後，德國寶馬車隊更未嘗一敗，惟今年巧遇歐洲房車賽死敵意大利愛快車隊，前者僅以一分之差，失意於ETCC賽中對手嘅愛快156，今回東來嘅寶馬320i，憑藉過去曾於東望洋賽道上14次摘冠嘅經驗，加上三支車隊共8部戰馬力敵愛快147，自然信心十足啦！

■曾連奪兩屆東望洋房車賽冠軍嘅鄧肯．許士文座駕，成全場焦點所在。

寶馬車隊摘冠志在必得
雖然愛快Nordauto車隊，有今年改投助陣嘅澳門車手古圖（AndreCouto）出戰，並取得排位賽頭位佳績，惟響以寡敵眾嘅情況下，力戰多部寶馬320i，真係要睇吓臨場表現及澳門車迷嘅支持度喇！至於曾連續兩屆（2001及2002年度）取得東望洋房車賽冠軍嘅鄧肯．許士文（DuncanHuisman），雖然響今年練習賽中，備受波箱問題困擾，但喺排位賽中仍能取得第二位，跟頭車時間相距不足一秒，相信亦有力問鼎三連冠呢！