面對着美食，特別是蛋糕甜品，成人也會食指大動，何況是饞嘴的小朋友。今次一班小蘋果會員穿上圍裙，走入一直被視為小孩禁地的廚房，落手落腳炮製美味的蛋糕，結果有得玩、有得食，重有得搗亂，難怪一眾小會員最愛烹飪活動。
記者：妹頭 攝影：聰哥哥
要炮製美味的蛋糕，一點也不簡單，材料的份量及製造的過程絕不可出亂子，否則蛋糕便會「化為烏有」。未開始前，一班小會員已經七嘴八舌地談論今次炮製的蛋糕，一個話要整朱古力蛋糕，另一個又話要整忌廉蛋糕，我被一班小蘋果會員圍着問個不停，簡直有點頭昏腦脹，正想大叫「救命」之際，終於見到我的「救星」，那便是專責甜品的大廚達哥。一見達哥，小朋友齊齊轉移視線，圍着達哥並大叫「廚神」，達哥見班小朋友咁活潑，終於肯透露今次炮製的蛋糕原來是我最愛吃的藍莓蛋糕，果然有Taste。既然有廚神指導，各位小朋友準備出手！
一個蛋糕的誕生？
首先將砂糖及牛油放入攪拌機攪勻。由於涉及機器，全由達哥包辦，小朋友眼看手勿動。
趁牛油及糖混合時，我們就將牛油及麵粉掃在蛋糕模內，呢個步驟好易做，各位小朋友都做得不錯。
將雞蛋、麵粉、牛奶倒入混好後的牛油及砂糖內，再度將所有材料攪勻。
加入藍莓茸攪勻，然後將所有材料放入預先掃好的蛋糕模內！
最後當然係將蛋糕放入焗爐內，一班小朋友已經急不及待踎在焗爐前，等待自己的「寶貝」誕生。
嘩！香噴噴的蛋糕出籠啦，個個小朋友急着找回自己親手做的蛋糕，場面一度出現混亂。
蝦碌鏡頭
各位小朋友始終係第一次入廚，難免「論論盡盡」笑料百出，我哋喺製作過程中，捕捉了一班小廚師的蝦碌鏡頭，大家一齊睇睇。
只係將藍莓茸混入材料，啲茸就飛晒上手，驟眼睇重以為軒朗搞到成手「血」。
未放入焗爐的材料，小朋友都唔放過，將枱面的匙羹都撈埋落去一齊攪，幾經艱苦，先將匙羹條屍搵番出嚟。
玩家心聲
Tiger仔：「我最鍾意食蛋糕、飲汽水，今日有得玩、有得食，好開心，若果整朱古力蛋糕就重好！」
軒朗：「件蛋糕好好食，我想留番一半畀媽咪試食。我好鍾意食蛋糕，今次好好玩，最鍾意將啲材料攪埋一齊。」
同場加映雞尾酒會
焗蛋糕時，靚靚的Macy姐姐教大家調製無酒精的雞尾酒，等大家有得食又有得飲。今次教大人細路皆宜的橙雜和ShirleyTemple，各位小會員邊睇邊搶住要試飲。
簡單易做
材料有橙汁、梳打水、紅糖水和雪碧，咁簡單可以返屋企自己試整。
試飲報告
橙雜好好味
第一杯調製的橙雜，婷婷二話不說便搶住試味，飲完後大叫：「好好飲呀！」
TowngasAvenue親子烹飪班
對象：子女年齡須介乎7至12歲
費用：$200（兩人）
＊另小朋友生日派對可安排小朋友邊慶祝邊學烹飪。
查詢電話：25761535
