前曼聯名將、退休後曾執教米杜士堡嘅白賴仁笠臣，至今仍然「下崗」。最近有傳英甲球隊巴拉福特想搵佢教波，不過巴隊今季好唔掂，一個唔覺意來季隨時變英乙分子，難得笠臣仍親口證實，對呢個燙手山芋有興趣，重話人工多少唔拘㖭，好似有啲屈就喎！
又難怪嘅，話晒笠臣都已經失業一段唔短時間，最近同尼日利亞又傾唔掂數；不過咁耐以嚟，我求大俠都見唔到有邊間英格蘭國內球會話想搵佢，似乎笠臣領軍能力重未得國內同業肯定。而呢次巴拉福特喺面對成績低潮及財困嘅同時，唔知算唔算揀無可揀，終於話想搵佢帶兵呢！
啱啱攞咗女子世界盃冠軍嘅德國，日前同由十四至十六歲𡃁仔組成嘅史特加青年軍切磋，點知就輸○比三。男性嘅生理質素比女性好，德國女子隊輸都好正常，但我求大俠就認為，史特加今屆喺德甲聯同歐冠盃打得咁好，佢班𡃁仔為咗唔想丟前輩嘅架，咪畀啲實力班姐姐睇囉！
好多球會都趁呢個國際賽期，畀無份踢國際賽球員「充電」，但維拉就無浪費空檔期，同阿聯酋球會艾拿沙踢一場表演賽，結果贏五比三。領隊奧拉利就話贏波之餘，可以入到對手五球，有助增強前鋒重拾射門信心。如果維拉喺聯賽真係頻頻有士哥，今次西亞之行收穫好過掘金。
AC米蘭下個月就以歐洲冠軍身份到東京同小保加爭洲際盃，而AC最近大肆宣傳，官方網頁嘅日語版本正式登場，首頁用「鎮山之寶」馬甸尼之餘，用大幅日本國旗做底色，認真畀面。我求大俠知道AC好想同皇馬爭搵日圓，適逢就要到東京比賽，推出日語網站，呢次係大好時機。
中國人成日講「知子莫若父」，估唔到NBA都係一樣。噚日鄧里維執教嘅快艇，就對番自己個仔米克鄧里維領軍嘅勇士。可能做老竇嘅一早已經過晒料畀自己教嘅快艇，所以今場米克鄧里維就被人嘜到「一戙都冇」；最後得嗰七分，結果就梗係老竇嘅快艇勝出啦！