四歲半的阿穎，生於草根家庭，父親梁先生因為失業逾月，靠一份糧尾及代通知金生活至今，全副身家只剩下數十元，既無力替女兒繳付幼稚園學費，令她被迫輟學，一家人正面臨被迫遷及斷糧的厄運，蘋果日報慈善基金即時撥款助梁家四口脫困。
「我好鍾意返學㗎，有好多同學陪我玩，不過，𠵱家爸爸、媽咪叫我留喺屋企，唔好返學，我覺得好悶，淨係得細佬陪我。」阿穎一臉天真地對記者說。
阿穎為家中長女，下有一名十八個月大的弟弟，她今年原該入讀幼稚園高班，卻因為家庭出現遽變，被迫輟學。「其實我哋做呢個決定都好無奈，因為阿穎出年就要升小學一年班，好驚佢唔返學會追唔上進度，不過，𠵱家屋企環境真係好差，已經三個月冇租交，飯都幾乎冇得開，實在冇辦法畀錢阿穎返學。」阿穎的父親梁先生向記者歎道。
三十二歲的梁先生，與內地妻子育有一對年幼子女，一直為家庭經濟支柱。梁先生從事生產及物料控制員已有八、九年，尚足一家四口餬口。奈何今年八月，梁先生不幸被公司辭退，自此便找不到工作。
「我中五畢業之後就出嚟做嘢，但從來未遇過咁嘅市道，呢幾個月，我大大話話寄咗七、八十封求職信，但真真正正有得面試嘅，實在冇幾多份。」梁先生幾經努力，早前終覓得新僱主，得以重操故業，並已於本周一正式上班。
梁先生表示：「𠵱家搵番份工，嗰心都叫做定啲，冇之前咁彷徨，不過，因為未有咁快出糧，經濟方面始終解決唔到。」事實上，自從梁先生加入失業大軍以後，一家便靠他那份「糧尾」及代通知金過活，惟早已到達山窮水盡的地步。
目前梁家已欠下三個月租金，電費帳單逾期未繳，且亦快將面臨斷炊。「包租婆已經講到明，如果呢幾日再唔清番啲欠租，就會即時趕我哋走，到時兩個細路就可能要跟我哋瞓街；𠵱家我全副身家得番幾十蚊，開工嘅車錢、飯錢都唔夠，真係好擔心有工都返唔到。」
蘋果日報慈善基金有見梁家身陷絕境，已即時撥款一萬五千元，協助他們清還所有欠租、雜費，及應付短暫生活，並同時幫助稚女阿穎重返校園。
暖流熱線
電話：29908688
傳真：23702192
電郵：
網址：
