金像影后茱莉亞羅拔絲（JuliaRoberts）曾幾何時係荷李活一姐，但係近年佢養尊處優，地位已經俾妮歌潔曼（NicoleKidman）、荷爾芭莉（HalleBerry）呢啲阿姐取代，佢靜極思動，已經諗計進行反擊。
雖然話茱姐聲勢大不如前，但係佢接拍勵志電影《MonaLisaSmile》，都重係收破紀錄嘅二千五百萬美元（約一億九千五百萬港元）片酬，令佢仍然坐穩最高片酬女星嘅寶座。呢部被譽為經典勵志片《暴雨驕陽》女性版嘅電影，原本安排暑假上映，但係電影公司睇好部戲有機攞奧斯卡，一再延期至下月中先至公映，實行同《魔戒三部曲：王者再臨》嚟個正面對決。
故事發生喺一九五三年，茱姐扮演一個加州大學柏克萊分校畢業生，受聘於Wellesley女校做教師，但係去到之後先發現，啲學生只係諗住日後搵個好老公，冇乜為自己前途打算，所以茱姐就決心改造佢哋。
部戲嘅背景的確同《暴》片好鬼似，但就加插咗啲愛情線，茱姐重有床上戲㖭，而且又有憑《蜘蛛俠》大紅嘅姬絲頓丹絲（KirstenDunst）等新紮姐仔傍住，我羅拉相信，應該都不乏捧場客嘅，不過茱姐可唔可以憑呢部片人氣反彈，就真係要睇過先知喇！