《魔牙靈》係今年XBOX嘅壓軸大Game，佢有乜咁把炮，睇製作班底就知唔嘢小，由《FF7》嘅主程式設計師川合博司操刀，製作經驗絕對毋須懷疑，人物角色都達到水準之上，好動嘅機迷必定唔可以錯過！
記者：許福合
雖然《魔牙靈》與《FF》玩法完全唔同，不過就同樣運用咗大量出色CG，每次過版或轉換場景都可以欣賞到3D動畫，顯示魔法特效同光影營造逼真場面，畫面堪稱一流，未開始打打殺殺之前，淨係睇CG已經係享受。玩落隻Game更啱小記口味，唔使解謎，版圖雖然大，不過採用分段式過版，只要按右上角地圖，就包唔會迷路，沿途見人就打，夠晒過癮。
講番打鬥操作，最正係唔使強記招式，遇到敵人基本上只要狂按B掣就可以打倒敵人，即使遇到較難應付嘅大佬，只要長按B掣發動必殺技，配合跳躍攻擊，要打倒大佬一啲都唔難。反而搵路過版就比較頭痛，因為要清除晒所有敵人先可以開門過關，地圖上雖然會以「點」顯示敵人位置，不過距離一遠就會消失，要清除所有敵人就要花唔少工夫。
遊戲類型：動作
對應機種：XBOX
遊玩人數：1人
行貨售價：$299
查詢電話：800964215
(c)2003MICROSOFTCORPORATION
