號稱世界最快戰車的F1，噚日終於處子秀喺東望洋賽道登場，果然沒有令觀眾失望，以一分五十九秒四八四完成一圈，打破從未有戰車以兩分鐘內完成一圈的紀錄；不過呢架由佐敦車隊費明駕駛的戰車第二圈差啲喺髮夾彎撞壆，好彩有驚無險，最後總算冇失威。
「小旋風」林志穎客串參加雷諾方程式，成績唔好就預咗，而評述員都好留手，好似小志以第二十八名完成，個評述員亦話佢「中規中矩」，其實只有三十一架車角逐排位賽，重有一架車中途退出，小志難聽啲只不過係尾四。
澳門碼頭附近一間酒樓，就推出一系列「大賽車菜式」，好似「東望洋賽道」其實就係東山羊（洋）腩煲，「坐亞望冠」其實就係「金銀炸帶子」，「獨佔鰲頭」竟然是粉絲蟹煲，「食字」食得咁求其，又點吸引車迷幫襯。