英格蘭班國腳喺上個月因不滿英足總棄用冇依時出席藥檢嘅李奧費迪南，曾要脅罷踢對土耳其嘅歐洲國家盃外圍賽。事隔一個月，佢哋又嚟料，但今次唔係為李奧，而係阿倫史密夫。
英領隊艾歷臣原本補選史密夫踢聽日對丹麥場友賽，但史密夫因喺比賽用樽掟球迷而俾差佬拉去問話，英足總就逐佢出隊同補選比亞堤。但英國腳就話，畢特之前俾警方問話都可以喺期間踢過三場國際賽，故史密夫喺未被起訴前應有權繼續比賽。
班國腳幫自己友爭取權益好合情合理，但小道消息話，佢哋其實因同英足總講唔掂明年歐洲國家盃嘅出場費同獎金，就借勢搞搞震，畀啲壓力英足總。𠵱家英軍由𡃁仔當道，郁啲就玩罷踢，如果舒利亞呢啲老大哥重喺度，睇怕佢哋應唔敢亂嚟。
納米比亞女子隊上個月喺奧運女足外圍賽，慘吞南非十三蛋；佢哋所以大敗，原來同賽前睇鹹片有關。班女仔因未睇過鹹片，於是就用酒店房內提供嘅電影播放設備，一口氣睇咗六套鹹戲。但男人睇完鹹片就話腳軟啫，女人睇完應該冇影響，莫非佢哋太過回味啲情節？
多蒙特由於唔滿意左腳膝頭哥有事嘅阿武羅素返巴西醫而唔留喺德國醫，於是就同對方炒大鑊。但阿武羅素就一於好少理，重好寸咁話如果多蒙特啲軍醫真係咁醒，就唔會搞到隊波有成十三個傷兵。講真，如果德國啲醫生真係掂，多隊教練森馬就唔會喺三十二歲就掛靴。
AC米蘭同祖雲達斯今年碰頭場面特別多，歐冠盃決賽之外，季前特登去美國踢意大利盃。兩隊其實已計劃下月二十三日到沙地踢一場友賽搵錢，點知日前發生駐伊拉克意軍被襲事件，結果兩間會決定取消此行。雖然佢哋都想搵食，但風頭火勢，都係唔好搵條命仔「校飛」。
自從費格遜話會簽董方卓之後，球迷網上意見都認同係商業決定。英國佬話「董」最多踢聯賽盃呢類盃仔，有中國球迷話佢唔係大連實德正選，除速度快之外冇乜特別。我求大俠未睇過佢踢波，但曼聯要簽佢，付出一百萬鎊一定唔使蝕，有幾多回報就要睇功力。