今年係澳門格蘭披治大賽車50周年嘅大日子，而且重係有史以來規模最大及最精采嘅一趟；其中響周日舉行嘅東望洋房車賽，最為港、澳車迷追捧，難得剛勇奪歐洲房車賽冠軍嘅意大利愛快車隊，連續第2年由Nordauto派出兩部愛快147戰車，向曾奪得東望洋車賽14次冠軍嘅寶馬車隊挑戰。而今年以愛快147作戰車嘅著名澳門車手古圖，更力壓一眾寶馬戰車以排頭位出賽，睇嚟當日嘅戰況定會十分激烈。
記者、攝影：陳偉林
今年再度出戰東望洋賽道嘅意大利Nordauto車隊，實力殊不簡單，皆因去年首度出戰東望洋，隊中車手勒連尼駕駛一部愛快147，曾摘取東望洋房車賽嘅一席亞軍，而今年歐洲房車賽中，Nordauto嘅愛快156戰車更力壓寶馬車隊，問鼎冠軍寶座。
愛快147表現突出
今屆東來嘅愛快車隊，對東望洋房車賽期望甚殷，惟勁敵嘅寶馬車隊亦不易應付，皆因佢哋有多年出戰東望洋賽道嘅經驗；而今年參賽嘅寶馬CarlyMotorsport車隊，在兩屆冠軍車手鄧肯．許士文（DucanHuisman）領軍下，還有同隊嘅梅拿（JorgMuller）及派奧（AndyPriaulx）可謂如虎添翼。惟首日練習賽中，自小響澳門長大嘅古圖，一直力壓多部寶馬戰車，位居前列位置；及後，古圖訪問中更直言，周日爭勝必須保持喺前三甲位置，以擺脫寶馬車隊嘅圍攻，預期今屆東望洋房車賽，又豈止係愛快鬥寶馬咁簡單呢！
為慶祝澳門格蘭披治大賽車嘅金禧紀念，今年大會特意安排比賽橫跨兩個星期，令熱爆嘅賽車氣氛，早已充斥濠江每個角落；今日，我哋特地搵嚟澳門格蘭披治大賽車委員會嘅發言人Davina，透露吓餘下嘅賽事有甚麼特備節目，能夠觸動車迷前來觀賞啦！
Davina有話講：
今年澳門大賽車金禧盛事，不僅帶給車迷多姿多采嘅賽程，濠江當地亦有相配工作，令每一位踏足澳門嘅旅客既感受到大賽嘅氣氛，又有賓至如歸嘅享受。再者，今屆重打破大會紀錄，有近千名來自歐、亞各地傳媒申請到臨報道澳門賽車嘅盛況，而各地車迷更可透過不同衞星網絡，現場或錄播欣賞各場精采比賽㗎！
除咗緊湊嘅賽程安排外，大會今年重邀得世界一級方程式佐敦車隊嘅首肯，赴運一部今屆嘅戰車到澳門，跟同車隊老闆艾迪．佐敦（EddieJordan），於今、明兩日賽事中作示範表現，給車迷有機會現場一睹Formula1嘅風範。
寶馬M3跑車俊朗嘅外形，跟卓越嘅性能演繹，經已教人目眩心動，難得今、明兩日賽事中，曾參與SuperCar車賽嘅M3GTR，亦會響東望洋賽道上跟車迷見面及示範；再者，大會重安排有雙座位雷諾方程式賽車等車款，首度亮相濠江之餘，車迷重有機會作座上客，響跑道上感受一下賽車嘅滋味呢！
