早年因涉嫌偷拍裙底春光而被警方拘捕的錢小豪，前日又被發現在上海背妻偷歡，直至昨日凌晨時分記者終於跟錢小豪太太丘倩鳴取得聯絡，對於夫婿不忠，丘倩鳴一度激動地說：「唔該逢場作興都唔好搵件咁肉酸啦！」
錢小豪前日被本報踢爆在上海背妻偷歡，跟一長髮姑娘十指緊扣漫步上海街頭。
昨日凌晨時分，記者終於跟錢小豪太太丘倩鳴取得聯絡，對於夫婿在上海偷歡，丘倩鳴初時有點懷疑，但當記者告之有圖為證時，她即表現激動。以下是丘倩鳴與記者的對話：
丘倩鳴：丘 記者：記
記： 小豪𠵱家係咪喺上海拍緊《絲路豪俠》？
丘： 呢部拍完啦，佢𠵱家喺上海開緊另一部戲。
追問對方長相
記： 我哋有記者喺上海撞見小豪十指緊扣咁拖住一個女仔。
丘（不大置信）： 唔會啩！會唔會認錯人呀！
記： 記者影咗相亦都拍埋影帶喎！
丘： 佢哋會唔會係拍緊嘢呀？
記： 個女人冇化妝，記者跟佢哋行咗好耐，知道佢哋絕對唔係拍戲！
丘（緊張地)： 佢哋真係好親熱咩？嗰個女人點嘅樣㗎？
記： 國字口面，非常普通，現場採訪嘅記者覺得個女人一啲都唔靚！
丘（顯得相當激動）： 唔該逢場作興都唔好搵件咁肉酸啦！個女人打扮點㗎？
記： 鮮黃色貼身上衣襯粉紫色長褲，都幾老土㗎，不過身材都算幾豐滿。
丘： 咁未必係出嚟做嗰啲！
記： 擔唔擔心小豪喺上海包二奶？
丘： 吓？唔會啩，佢上咗去冇幾耐咋喎。
記： 會唔會打畀小豪了解吓？
丘（又再次激動起來）： 我梗係要打畀佢了解吓乜嘢事啦！原本我好開心喺屋企整緊，但家……都唔知講乜好啦！
昨日記者再聯絡丘倩鳴，但其電話已接駁到留言信箱，跟錢小豪一樣未能聯絡上。而小豪胞弟錢嘉樂的好友林曉峰昨日主持商台節目時，亦不禁歎句「斷正」。
此外，小豪好友方中信昨日在電話中被問到小豪背妻偷歡一事時，亦不禁歎說：「我未睇過啲相，真係唔識講……但始終佢係有家室嘅人，有老婆有仔，希望佢浪子回頭啦，有機會我都會勸吓佢嘅！」
採訪：戴彩煥