雖然呢排工業股炒風冇之前咁狂熱，但可能因為芬佬仍然錢多，所以久唔久都見佢哋增持工業股，情況就好似玩音樂椅咁，一個芬佬起身時，又有第二班芬佬接手。
經紀黃話，呢個情況可以在玩具股龍昌（348）身上體現。上個星期光大花旗基金，按0.45元行使價，行使一批龍昌可換股優先股，然後再以0.60元將股份沽出，成功獲利離場。
基金沽貨獲利消息，加上公司發行股數突然大增，龍昌股價復牌自然急跌，但成個星期咁耐，始終冇跌穿過0.60元配股價，至於箇中原因，就係人棄我取。當花旗光大離場之時，有芬佬覺得龍昌質素唔錯，所以肯接貨，因此股價企得咁硬淨。
龍昌昨日上升4.8%，收0.65元，雖然成交金額只得168萬元，但經紀黃話可以留意走勢，短炒一轉。
另外，經紀黃又提起建滔化工（148），最近隻股成日都有大手成交，據講好似因為有批公司輪就快到期，有人以行使價5.80元認購新股，然後以市價沽出獲利之故。
慕容小初