近兩年BANPRESTO好似發錢寒咁，車輪式猛咁推出《機戰》續篇，PS2同GAB版本輪住出，機迷一早已吃不消，不過開發商仍然唔放過呢隻會生金蛋嘅鵝，以真實比例機體同實時戰略系統推出新作，企圖打破悶局挽留機迷，今日就同大家分析BANPRESTO嘅如意算盤打唔打得響。
記者：徐影龍
新一集嘅《機戰SC》除沿用過往主力機體及打正《機戰》旗號外，由機體到系統都嚟個反傳統，所有機體唔可以變形、合體，又冇精神指令，基本上可當一隻新Game咁玩，筆者就重點剖析當中主要變更點嘅各項優劣，睇吓《機戰SC》能否順利過渡。
《機戰SC》首要賣點係機體以真實比例登場，唔似舊作咁Q版化，加上全3D造型，所有角色都好真實，尤其係超級系機體，如高過層樓嘅《超獸機神》斷空我、超力電磁俠等，由出場至戰鬥都相當之有氣勢，筆者最喜歡以兩架超級系機體，「圍毆」矮一截嘅渣古，一個拳打一個腳踢，場面相當之搞笑。
至於動作方面，做得頗有心思，超級系機體普通較「鈍」，而高達系則靈活得多，其迴避及射擊動作似足街機隻《高達DX》，最啱喺外圍一下一下開槍，逐少削減敵人HP。至於Load碟時間已經大有改善，已經唔似之前PS嘅《機戰S》及《FrontMission2》咁，Load一場戰鬥嘅時間簡直可以「淥個杯麵食」咁誇張。
實時系統乃《機戰》首度採用，玩法就如PC名作《AgeOfEmpire》咁，分派部隊去各地，一邊索敵一邊戰鬥，玩家最多只可謀定戰術，如埋身戰、射擊戰等，至於用咩武器同招式，就由電腦話事。筆者就相當不滿呢種隔岸觀火嘅玩法，而且電腦AI好似打咗懵仔針咁，兩軍兜口兜面見到都唔多願郁，打一招又要唞一唞，一啲熾熱戰鬥氣氛都冇。幸好玩家可自主使出必殺技殺敵，招式亦算華麗過癮，不過弊在攻擊範圍大，九成會打中圍攻緊嘅兄弟，需要花時間調開我軍，一個字——「煩」。
值得一讚係視點設計，Zoom近睇交戰情況，的確幾過癮，不過千祈唔好太過集中留意一隊機體，以為呢邊食硬敵人，點知「火燒後欄」，另一邊俾人打到冧晒。由於每當開啟菜單下達指令時，遊戲均會停頓落嚟，敵人亦唔會進攻，所以嚴格嚟講只算「半實時」玩法，玩家亦可趁此時謀定戰略，諗清楚進攻路線，免致太過手忙腳亂。
平心而論，呢隻《機戰SC》算係做得唔錯，機體3D造型頗為細緻出色，而玩法簡單得嚟亦有少少難度，唔可以一套打法用到老，不過唔係太多人鍾意實時式打法，尤其如筆者般玩咗咁多年回合制嘅打法，始終唔多接受「趕候趕命」咁玩，加上機體少得可憐，又唔可以揀武器，重要行貨都賣成$480。喂，《機戰》唔係大晒㗎喎！
售賣點：DreamStore
地址：灣仔東方188商場256號舖
教你對付「三大使徒」
今集最麻煩嘅對手唔係各大首領級敵人，而係《新世紀福音戰士》嘅使徒，因為佢哋跟足原著咁擁有AT-Field防護罩，一般激光、死光系武器完全吹佢唔脹，尤其第11關三大使徒接力輪住出場，好多人打第一隻已經全軍覆沒。要順利過關，首要條件係兩、三隻超級系機體以突擊戰術慢慢削減使徒HP，到HP低過4,000所有武器均打唔入使徒，需要EVA嘅必殺技先可以幫佢埋單，其間有效交替待機機體同留意HP剩餘，就可順利過關。