聖誕節重有個幾月至到，地鐵已經急不及待為旗下商場裝身迎佳節，因聖誕老人係呢個節日嘅主角，地鐵就喺青衣城商場，開設聖誕老人學院，教人做專業聖誕老人，不過只係小朋友至有份入學。
呢間全港首創嘅聖誕老人學院，佔地約三百六十方呎，可同時容納近百人。地鐵專程請嚟加拿大頂尖聖誕老人VictorNevada來港教授，佢係少數嘅全職聖誕老人，喺芬蘭接受過正統訓練，過去二十年，年年都有做聖誕老人。佢今個月底同聖誕節期間，會喺青衣城開班教授，所有完成聖誕老人訓練嘅小朋友，重會有畢業證書㖭，唔知第時聖誕節係咪可以揸住嚟搵工呢？
青衣城商場嘅裝身費達二百五十萬，融會拉斯維加斯式嘅設計，全場用咗五千個聖誕老人做布置。
北京東方廣場嘅商場「東方新天地」，同新加坡新達城結為姊妹城後，聯手合辦一項跨地域慈善活動，贊助著名攀山好手同探險家邱瑞昭，由新加坡踩單車到北京，成個旅程約八十日，全程八千二百公里，經過馬來西亞、泰國、老撾、越南等地。
活動結束之後，邱生重會將部單車捐出嚟公開拍賣，底價二千新加坡元，約莫係九千港紙，善款就捐畀新加坡慈善機構。
發展商不時都會去睇行家樓盤取經，但突然出現記招，就比較少見。向嚟鬼馬嘅恒基地產營業部總經理張炳強，噚日做咗嘉里地產大埔滌濤山記者會嘅神秘嘉賓，喺接近完場時現身，去見校友嘉里代理執行董事朱葉培！
日前自揭係理工第一屆畢業生嘅張炳強，噚日打住理大校呔，見校友朱葉培冇帶，就忍唔住將自己條校呔送畀佢，後嚟見到美聯集團主席黃建業，又問佢要唔要番條，睇嚟張生對母校感情極之深厚。
噚日多個發展商都話有新示範單位開放，蘭西於是懷住興奮嘅心情，一心諗住影番幾張靚相兼有稿交，點知一日之內連番失望。
首先，長實打鑼打鼓，話開放元朗錦田四季雅苑示範屋，山長水遠去到地盤之後，先話裝修重未搞掂。雖然有得睇，但係唔畀影相，好在影番幾張花園、天台同地盤嘅相，至未去到空手而回嘅慘況。
嘉里同信和合作嘅荃灣寶雲滙，噚日首次開放Barry'sLaurel示範空中花園，一心諗睇新嘢，點知原來只不過係第五座十九樓A單位嘅天台，再度失望。
開業十周年嘅有線電視，網絡覆蓋達二百萬戶，啱啱去到尖沙嘴擎天半島，所以有線同擎天發展商禮拜一會開記招，搞慶祝活動。
擎天發展商係會德豐系公司，同有線屬一個集團，唔知係咪咁，擎天可以做第二百萬戶嘅屋苑，順手做埋宣傳，實行肥水不流別人田。
蘭西
電郵地址：
