噚日周五，有乜好節目？有人就話，可以去南生圍湊吓高興，睇睇位澳洲鱷魚先生利弗第一日出師是否成功；八方聽聞，當局肯發個牌畀呢位捉鱷英雄，皆因佢肯喺兩岸數百記者、村民以及趁熱鬧嘅市民圍觀，閃燈同電話聲此起彼落嘅情況下落水，重有信心一定捉到呢條鱷魚仔。
但亦有人覺得，喺度等條鱷魚仔蒲頭太冇聊，都唔知等到幾時，加上又有蚊咬，一個唔該搞到周身痕，寧願早啲起身睇吓班尊貴嘅立法會議員捉幕後黑手，睇吓邊個放料畀啲傳媒抹黑胡紅玉，又縮埋個頭唔敢認。
個會又的確好夠娛樂性，阿鄔真係噏得出就噏，既唔肯認係佢放料，又話啲罪名全部係坊間傳聞，佢冇考證，但就叫王見秋辭職時考慮讀埋出嚟；許冠文周星馳之後，睇怕輪到佢。
快閃局長何志平重叻，話私人密會時，講到抹黑人六宗罪嗰陣，佢啱啱閃開咗，有不在場證據。但係當晚《蘋果》記者喺置地廣場電梯口守候三粒幾鐘，完全冇見局長出過嚟。
（圖）何局長（右）話當晚講到胡紅玉六宗罪嗰陣，佢啱啱閃開咗；阿鄔（左）就話啲罪名係坊間傳聞。信不信由你。
傳真︰2623-9278
電郵︰