香港大學教育撥款，肯定會削減，至於削幾多，暫時只有唐司長、李局長知，如果睇報紙，大家都頭昏眼花啦，都唔知邊句真。呢個董特首領導嘅特區政府，經常左手打右手，打到半路，特首加把口，於是亂上加亂。
香港如此，英國大學經費更唔掂，貝里雅話政府冇錢，要加學費，學生已經上街示威，都唔知國會批唔批准加學費。英國啲大學全部係官辦，冇私立大學，政府一聲咳錢，惟有各展奇謀去搶錢，其中一個方法係招收海外學生，海外學生交學費貴好多，好似貴成兩三倍，好好搵啫。
賓架E同律師M結婚多年，有三個寶貝仔，兩個跟隨賓架E嘅舊路，去美國留學，但係第三子就話要學媽咪做律師，唔去美國，要到英國讀法律。賓架E上個禮拜陪三子去英國面試，一落機就租咗架車，三日之內從倫敦北上南行，走路七百里，面見四間大學，間間都話收佢位公子，於是賓架E反而有啲頭痛，佢話：「去邊間好呢？」成班老友記問佢：「有乜好揀擇先？如果唔係牛津、劍橋倫敦，大概差唔多啩？」賓架E諗咗一陣：「去利物浦大學都好噃，起碼有好波睇先？」我哋哈哈大笑，阿仔入利物浦大學，等老竇有藉口去利物浦睇奧雲，好計也。點知賓架F一句：「好，乜唔好呀，同秋官做法律系校友噃！」一經提醒，賓架E窒一窒：「都係咪搞咯，讀法律噃，去利物浦？要再諗過。」