劉德華恨攞獎就係人都知㗎啦，連佢自己都公開講過好幾次，所以佢年年都盡量出席各大頒獎禮，而每年喺各大頒獎禮中，華仔嘅成績都唔錯。不過噚日華仔就話自己今年可能個個頒獎禮都去唔到，華仔話：「咁多年都未試過，未過聖誕節就有頒獎禮，今年港台十二月十九號就舉行，我就去咗美國做巡迴，新城嗰次我又返唔切嚟，一月我就要去第二度拍戲，所以其他嗰兩個（《十大勁歌金曲總選》及商台《叱咤樂壇頒獎禮》）我都應該去唔到。」
可能就係因為知道自己去唔到頒獎禮，所以前幾日華仔先講定話覺得今年冇信心攞傳媒大獎，重講笑話自己攞呢個獎每兩年一次「單吊」。
咁又係，以香港嘅頒獎制度，唔到嘅自然會少好多獎，一早話定冇信心，到時攞唔到都唔會瘀吖嘛！
不過，華仔都好識做咁補飛話：「其實出唔出席都唔關事嘅，有水準就自然有獎㗎啦。」之但係無綫已經擺到明唔出席就冇獎攞，有水準都冇用啦！
方力申及Cookies等，前晚喺新城出席《勁爆盛放日》記者會，倪震早前喺節目中要求聽眾投票選出「最似處男的藝人」，結果方力申榮登榜首，方力申笑住話：「我覺得齋睇個名係個美譽，喺人哋心目中係clean嘅，即係代表形象健康。」方力申咁多唔同嘅緋聞女友，係咪真係咁clean真係佢自己先知啦！
王菲將會喺下個月舉行一連八場嘅《菲比尋常王菲演唱會》，雖然已經有五年冇開過演唱會，但歌迷對阿菲都相當支持，賣飛嘅情況重好熱烈。而今次嘅演唱會中，阿菲真係不惜工本，佢唔止會用吊喺半空嘅空中舞台出場，而佢重藝高人膽大咁向導演提出要求，要同十二位樂隊成員齊齊喺空中舞台出現，但唔知十二位成員會唔會有畏高症呢？
葉蘊儀早排去咗日本出席東京電影節，以前佢喺少女時期，曾經出過唔少日文碟，雖然已經係十幾年前嘅事，但因為佢都識得唔少當地嘅朋友，所以喺呢次五日行程之中，佢都同唔少當地嘅朋友見面敍舊，不過呢期因為日圓太貴，佢去到日本都要忍手，唔敢買嘢。
關心妍（Jade）同陳文媛噚日喺港台出席一個護膚活動，阿Jade對護膚好有心得，話要由內到外都要護理先得喎！而佢嘅方法就特別富貴，就係食燕窩，講起呢方面阿Jade都好專業咁話：「我唔鍾意搽粉底，會好傷皮膚㗎！自從入咗行後我每日都食一羹燕窩。」嘩，日日食燕窩咁富貴，咁貪靚嘅代價真係貴咯！
黎姿、吳美珩、滕麗名等為咗無綫台慶，近日不斷喺將軍澳電視廣播城排舞，黎姿今年喺無綫節目巡禮上，被安排企喺當眼位置，又有份參與台慶表演，顯然好受重視，黎姿話：「今年我幫無綫拍多咗嘢吖嘛，可能公司又覺得我乖呢，而我下年都會繼續專注拍劇。」咁識賣口乖，難怪得到無綫寵愛啦。
