新車速報：<br>新一代日產Cefiro外貌車廂皆誘人 <br>

新車速報：
新一代日產Cefiro外貌車廂皆誘人

日產代理終於運嚟全新面貌嘅Cefiro車系，打頭陣嘅2.3公升型號，同級車中起用V6引擎，冠絕同儕之餘，時尚又見活力嘅賣相，可謂剛柔兼備；而豪邁得體嘅座艙陳設，更教人回味無窮呢！
記者、攝影：陳偉林
ImageGirl：AmmettefromImagine
車輛提供：合誠汽車（23688235）
部份圖片由日產汽車提供

跟上一代比較，全新Cefiro車系可謂脫胎換骨，簡約造型表現溫文爾雅一面之餘，流暢嘅線條更帶出一份爽朗嘅動感，正好切合一班追求時尚，又具品味嘅用家要求㗎！

■大型立體尾燈配搭，勝在有一份易看嘅安全性。

■看似掀背嘅尾廂冚加有電鍍修飾，倍見貴氣感。

■流暢車身線條加上低風阻門邊電鏡，令外形倍見突出。

■特大高聚焦車燈，匹配霧燈裝置，表現有高透光度。

■四幅式半皮半桃木軚環，右旁重附有多個遙控按鍵。

■鋪排井然嘅表板陳設，有易於察看嘅好處。

■卡片型「e-匙」方便攜帶，重可以隨手開關車門及尾廂。

■一套4前速自動波別具房跑車風格，轉檔靈敏又流暢。

■表板旁另備有門邊電鏡開關，有觸手可及嘅方便。

剛柔兼備彰顯個性
新車賣相至突出嘅地方，莫過於兩廂半式嘅配搭，既不失四門三廂式轎車嘅實用性，而略帶掀背形式嘅車尾結構，望落更富動感呢！再者，一對炯炯有神嘅高聚焦大燈，匹配於閃閃生輝嘅電鍍鬼面罩兩旁，性格突出又見魅力，早已令一班車迷留有深刻印象。

■座艙鋪排寬敞吸引，別具大車嘅豪邁個性。

■後排空間寬敞闊落，好切合豪華轎車要求。






簡約陳設不失雅潔品味
打開車門所見，前後兩排高級皮椅軟滑又貼服，配襯響Masame優雅桃木裝飾，既能凸顯出一份豪邁個性之餘，簡約嘅表板陳設，重有隨手可及又易用嘅方便。再者，除四門電窗、門邊電鏡及電天窗外，重有一體式恒溫冷氣連6碟CD高級音響，加埋不可或缺嘅四個安全氣袋同前後獨立房燈裝置，享受至高又愜意呢！

■尾排之間嘅大型手枕後方，有活門直通尾廂。

■門壁手枕以人體工學設計，駕駛席另備尾廂電索掣。

■中控台上音響及恒溫冷氣編排，隨手可及，上方更備有多功能顯示屏。






2.3V6偈同級至突出
全新Cefiro以一台2.3公升V6偈作配搭，加上4前速自動波，輸出強而有力又不失寧靜度，令車廂保持有出眾嘅寧靜感。其次，全新底盤及後懸掛用上多連桿組合，明顯有較佳貼路性及循迹力，轉彎抹角既平穩又富支持力，重有降低重心嘅好處㗎！難得此車極左或極右嘅迴旋半徑僅5.3米，轉向靈活之餘，加埋四輪碟煞、ABS連EBD裝置，重予人多一份安全可靠感㗎！

■大型首飾箱內藏6碟CD匣，又可以擺放雜物。

■電天窗前後，分別有獨立房燈同兩邊扶手裝置。

■低腰線尾廂鋪排，方便提存大型物件。

■一台全新2.3公升V6偈，表現不俗。

Ammette評語車廂闊落坐得舒適
呢部新Cefiro嘅車身線條優雅出眾，最突出莫過於闊落嘅車廂空間，以及前後兩排高級真皮座椅，坐得貼服之餘又見十足承托力，響寧靜嘅環境下聆聽音樂，可謂享受至高。

記者評語造型有行政房車風範
新車外形突破傳統，既流暢簡潔，又見一份時尚及活力感，好有ExecutiveLook行政座駕風範；而一台新加入嘅VQ系列2.3公升V6偈，表現可靠穩定，輸出既寧靜又富扭力，匹配全新底盤設計，行車平穩又見寧靜度。

■前座貼服富承托力，重有全方位電控組合。

日產Cefiro230JM規格
引擎：2349ccV6DOHC
馬力：173ps/6000rpm
扭力：22.9kgm/4400rpm
傳動：4前速自動波，前輪驅動
懸掛：（前）麥花臣支柱（後）多連桿
制動：（前）透氣碟（後）碟式（ABS）
輪胎：205/65R15BridgestoneB390
尺碼：4890×1765×1475mm
軸距：2775mm
車重：1534kg
平均耗油：11.2km/L

■新車底盤屬全新設計，配合出色懸掛組合，行車循迹性之高予人信心。

同級對手比較
本田Accord2.4
引擎：2354cc直4DOHC
馬力：160ps/5500rpm；扭力：22.3kgm/4500rpm
尺碼：4830×1820×1455mm
軸距：2740mm；車重：1475kg
新車售價：$223,800（合群汽車：23802231）

評語：新車有不少變革，造型帶有濃厚房跑車色彩，車廂鋪排講究又見空間感，重有不俗行車操控性㖭！

豐田Camry2.4
引擎：2362cc直4DOHC
馬力：152ps/5600rpm；扭力：22.2kgm/3800rpm
尺碼：4815×1795×1500mm
軸距：2720mm；車重：1415-1490kg
新車售價：$218,010起（皇冠汽車：28661020）

評語：外形富活力感，車廂陳設齊備又見寬敞，輸出數值雖一般，惟扭力表現突出有勁，其可靠性更獲得車迷支持。