西門子首部6萬5色彩芒<br>ST55大玩靚鏡頭

西門子首部6萬5色彩芒
ST55大玩靚鏡頭

西門子今年中已發布會推出兩部6萬5彩芒手機SX1及ST55，當眾街坊都以為今年尾係SX1大戰諾記6600及索記P900之際，可惜SX1仍然芳蹤杳然，相反ST55就衝閘而出，成為西門子首部開賣嘅6萬5色彩芒機。有靚芒自然要影靚相，內置30萬像素VGA鏡頭，將6萬5色彩芒發揮得淋漓盡致，加埋40和弦，$3,480絕對冇收多你！

記者、攝影：劉耀祥　ImageGirl：Cody

ST55PROFILE
制式：GSM900/1800雙頻
顯示器：65,536色/TFT/120×160
鏡頭：30萬像素VGA
功能：GPRS、40和弦、WAP、錄音、MMS
備用時間：140小時
通話時間：150分鐘
體積：98.5×47.2×21.6mm
重量：87g

$3,480
■兩吋大畫面，睇相睇MMS都夠晒清楚。

突然衝閘跑出嘅ST55，第一眼就感覺風格與以往西門子手機不同，機身四邊都「青靚白淨」，一個掣都冇。將近兩吋嘅顯示器就已經佔去機身2/3面積，所以全部按鈕就要退避三舍，縮喺機身下方。而按鈕與顯示器亦相隔近10mm，可以減少㩒掣時對顯示器下方的壓力，令到螢幕出現變色情況。雖然用意確實唔錯，不過從男性角度使用時就有點「屈就」，一隻手指公「捽」落去都隨時命中兩、三個掣，唯一方法就係用手指公跳吓芭蕾舞，輕輕跳輕輕踩，咁就唔會㩒錯隔籬。



鏡頭高質玩味至得
ST55內置30萬像素VGA鏡頭，影像自然唔會差得去邊，鏡頭設於機背較高位置，唔會咁容易俾手指遮住，實用性高，可惜未有保護蓋，唔小心就會揩到指模。而玩樂程度都相當足夠，設有三級解像度調校及三種特別效果（懷舊、黑白、藍色），加上兩倍及四倍Zoom，半身都可以變大頭。而西門子於影相程式十分有心思，只要㩒住「＃」就會有狀態畫面出現，可即時調校特別效果、解像度、夜間模式及開啟狀態Icon，毋須於選單跳來跳去。但最致命就係ST55並沒有內置藍芽或紅外線，跟機亦不設Cable，所有相都只可經MMS或Email傳送，實在甚不方便。

■按鈕受大芒所累要「迫遷」，所以縮晒去機身下方。

■機身四邊光脫脫，只係機頂有手繩扣位。

■機身體積比諾記7250稍短，不過厚度就較厚。

■備用有140小時，只算勉強合格。



65,000色彩芒Show靚相
6萬5色彩芒終於出現喺西門子身上，確實令西門子Fans值得高興。最遲唔代表最差，相反可能係更加好嘅一個，因為可以睇勻對手㩒住嚟砌。而西門子今次6萬5色初試啼聲，亦都冇令人失望，色彩表現豐富，加上背景光度充足，室內室外都睇得舒服，可惜解像度稍嫌低，清晰度就爭少少，睇人像相線條就比較粗，令整體感覺要扣分。ST55亦猛晒6萬5威力，九宮格選單全圖像顯示，初用西門子的用家都可以輕易上手。內置三個遊戲，打地鼠、俄羅斯方塊及扭計骰，可玩性都算幾高，可惜未支援JAVA，唔可以再加新遊戲。據聞遲啲會有部ST55i，先會加入JAVA功能。

■可顯示影相設定狀態，一睇就清楚晒。

■鏡頭位置偏高，冇咁易俾手指遮住。

■唔單止可以訂球道打Golf，重可以知更多高球資訊。

■選單以九宮格顯示，容易上手。

■自創鈴聲可輸入15條音軌，想點玩都得。