劉嘉玲昨日在廣州為水晶飾物宣傳，首次行天橋的她表現中規中矩。嘉玲表示平時很喜歡欣賞時裝表演，自知表現不及超級女模，但勝在有風格。不過，她戴過份量十足的水晶耳環後，卻表示耳環太重，怕耳仔會甩出來。
劉嘉玲昨日在廣州出席施華洛世奇水晶宣傳活動，並穿上Versace黑色性感晚裝示範「真我個性」系列新款水晶首飾行騷。首次行騷的嘉玲表現中規中矩，大會更送了一個水晶手袋給她。
問劉嘉玲首次行天橋有何感覺？她說：「我覺得感覺好得意，不過對耳環太重，我好驚會吊甩隻耳仔。雖然我嘅表現不及得超級模特兒行天橋咁，但係我成日有睇時裝騷，好想試吓呢啲滋味，𠵱家試過，原來真係好特別㗎。」
談到佩戴飾物的心得，嘉玲畀面大會，賣口乖表示很喜歡水晶飾物，平時會選購配襯服裝。有記者問嘉玲既已適齡做母親，可渴望生BB？她說：「我都希望做媽咪，但係我並唔擔心年紀大生唔出，因為𠵱家醫學好昌明嘛。」
嘉玲接拍王家衞的新片《2046》，當中她和對手張震有親熱戲，可會擔心男友梁朝偉不滿，嘉玲說：「我哋兩個都係做呢行，我哋會明白係乜嘢一回事，佢唔會嬲。」
提到偉仔和劉德華今年齊齊入圍角逐台灣金馬獎影帝獎項，問嘉玲希望誰得獎？她說：「邊個攞獎我都咁開心，我覺得華仔都有努力過、付出過，而且華仔演技都好好。」
撰文：BeverlyWong
