同賓架陳講完銀行股，醒起佢以前讀過MBA，問吓佢有乜趣事。賓架陳話：「嗱，我再讀書之時，已係高級經理身份，做得幾辛苦，夜晚返學做功課又係咁辛苦，當年真係捱得幾慘，有一次把幾火，因為公事繁忙，MBA功課交遲咗一日，鬼佬教授竟然睇都唔睇就話我遲交功課，最叻都係得個C。我當堂撞火，話佢唔體諒學生返工兼讀書嗰鋪辛苦法，不識世情，我實會記住。你知啦，好多大學商學院教授，一日商界實戰經驗都冇，一世人讀書讀到PhD就出嚟教書，教我哋做生意？只識理論啫，未必合乎實用嘅。」
係人都知啦，咁你又要捱餐死讀個MBA？賓架陳話：「儍仔，我哋要張MBA證書嚟升級加薪啫，你估做學問咩，啲PhD教授開科授徒，收咁貴學費，都知道我哋睇未來回報㗎啦。」賓架陳今時今日，經驗豐富到極，直情有資格去大學教MBA，不過咁喎，佢冇博士學位，又冇學術論文發表，大學搵佢教，會拖低ranking(按MBA排名榜要睇埋教授是否具備博士學位及有無著作)。賓架陳哼一聲：「我真係有真材實料、人生經驗去教MBA㗎，不過要顧慮到排名問題，就唔好搵我！」賓架C退休後，教EMBA樂此不疲，左丁山就笑佢冇博士銜頭，遲早俾大學炒魷！回頭醒起鬼佬教授畀C阿賓架陳，問佢有冇下文，賓架陳哈哈大笑：「後來鬼佬教授兼任做管理顧問，問我銀行有無生意畀佢，我叫佢搵第二間！」