泰國
香港竟然都有鱷魚出現，諗落都幾好笑！呢條小鱷雖然冇食人，但已經令廣大市民關注，重搞到港府大陣仗請來澳洲專家捉鱷魚。有啲鱷魚fans重專程去元朗睇鱷魚蒲頭，其實此舉都好危險！如果真係對鱷魚咁有興趣，不如去泰國芭堤雅，唔單止可以睇鱷魚、玩鱷魚，重可以用隻雞做餌釣鱷魚！
文、攝：胡慧沖
位於芭堤雅附近的SrirachaTigerZoo，擁有全亞洲最大的鱷魚場。場主姓張，佢養有過萬條鱷魚，重自己繁殖鱷魚蛋，甚至將鱷魚出口去大陸。呢個場與泰國其他的鱷魚場唔同，從一隻鱷魚蛋開始，畀你由細到大去認識成個鱷魚家族。
雖則呢度啲鱷魚自出世開始就受到特別訓練，但佢哋始終都係野獸，而且亦需要朋友。所以到壯年的時候，班鱷魚仔就會被安排與同類一起生活於鱷魚潭之中。遊客想認識其獸性真面目，即管試吓釣鱷魚！喺鱷魚潭上架有一條鐵索橋，只要將一隻剝晒皮的生雞當餌，慢慢放落鱷魚潭，班大鱷立即聞腥而至，繼而躍出水面搶食。所以話，想捉鱷魚真係「Easy執！」不費吹灰之力就引到成班大帝游過來，唔似漁農處咁放個鐵籠落水，最終都俾佢走甩咁瘀皮！
不過，最大工程都唔係引鱷出動，而係俾隻大鱷擔住隻雞之後，點樣釣佢上水。你幾乎要出晒成身氣力與鱷魚角力，但講到尾又點可能夠佢大力呀，不過總算過晒癮，感受到班鱷魚的強勁力度！講番轉頭，就算畀你釣到條大鱷上岸，睇怕都嚇到走夾唔唞啦！
每逢鱷魚蛋孵化季節，遊客都可在工作人員協助之下替鱷魚BB破蛋而出。只要付出每位300銖的價錢，重會幫你拍埋錄影帶寫真留為紀念。而啱啱出世的鱷魚仔細細條，眼仔大大，搖頭擺尾好百厭，都幾Cute！不過佢哋天生的反應都係鍾意擘大個口咬吓你隻手指，怕痛的話就要捉住佢的尾部，因為佢個身體暫時都未夠長，未掂到自己條尾。而喺呢個時候，個個都會爭住同佢哋影相，皆因佢哋長大之後都無乜咁嘅機會任你舞！
所謂人養鱷、性本善，鱷魚場的人為咗令鱷魚減少戾氣，細細個就安排佢哋同啲鴨呀、魚呀一齊生活，等佢哋慢慢習慣同其他動物共存的環境。睇到呢班大鱷都可以同鴨仔生活相安無事，個畫面真係夠抵死！
■遊客可以擔當鱷魚仔的接生醫生。
人鱷表演乃泰國鱷魚場的指定動作。而泰國人不嬲迷信，乜都拜一餐，所以表演者出Show前都會拜吓神，跳番Part舞祈求表演順利。通常基本動作都係與大鱷進行近距離接觸，例如伸手入大鱷口、頭頂大鱷甚至與鱷同眠。其他鱷魚場進行表演的全是年輕壯男，但這裏都是美少女，以靚女色誘大鱷，令鱷魚五體投地。估唔到，原來鱷魚都可以咁溫馴！
睇完Show，不妨試吓呢度啲新鮮鱷魚湯、鱷魚肉沙嗲、鱷魚蛋、鱷魚掌甚至鱷魚鞭，即時飽吓口福之欲。而鱷魚肉最出名嘅就係可以醫治哮喘，但帶鱷魚返香港屬犯法行為，幸好呢度有得賣鱷魚肉提煉嘅鱷魚油。
唔講唔知，原來鱷魚真係成身是寶：鱷油燙傷膏、鱷血抗癌丸、鱷肉哮喘丸、鼉甲益肝丸、鱷胰降糖丸、鱷鞭回春丸、鱷骨追風酒劑等等，聽個名就知鱷魚周身刀張張利，幾乎每個部位都有醫療作用。不過功效係咪真係咁神奇，見仁見智。
1 豬、虎、馬騮共處一籠，唔知老虎仔飲咗豬奶會唔會豬咁蠢呢？
2 園內更有駱駝畀你騎，趁你唔覺意佢哋重會打吓「茄輪」㖭！
3 呢度可以同老虎仔合照，但小心佢會隨時大便喺你身！
4 「毒蠍子表演」由玩蠍Twins擔大旗，膽識過人。
5 這裏還有豬仔游水鬥快的表演，認真搞笑！
地址：341Moo3,Nongkham.Sriracha,Chonburi20110
電話：（66）38-296556
網址：
入場收費：成人300銖；小童150銖
開放時間：8:00am-6:00pm
簽證： 持BNO或特區護照毋須簽證可逗留30日。查詢：25216481（泰國領事館）
套餐： 乘泰航5日4夜住宿PattayaHardRockHotel，套餐價$2,590。查詢：27700966（奧運旅行社）
交通： 由曼谷機場乘搭Limousine直入芭堤雅，票價約1,500銖。抵芭堤雅市區後可乘搭兩排車往鱷魚場，票價約200銖。
網頁：
貨幣： 1港元約兌5泰銖