當紅女歌星同男友歌手成日離離合合，但始終都係走番埋一齊，雖然佢兩個都各自有偷食，但當紅女歌星脾氣大，唔係咁多男人頂得佢順，始終都係男歌手就得佢，而且又好耐性，分咗手都用盡方法去𠱁佢，終於打動到當紅女歌星，男歌手除咗用真情攻勢外，原來重有銀彈！
唔好睇當紅女歌星搵錢多過男友歌手，其實佢係好貪小便宜嘅人，而且生性孤寒，對錢銀睇得好重，咁多年嚟男歌手都有畀附屬卡佢用，就算分咗手都冇話要收番，可能男歌手希望終有一日可以同佢好番啩！而當紅女歌星又真係老實唔客氣，唔會因為自己搵錢多過對方就唔使佢啲錢，一樣照碌佢張卡。個男友咁好，當紅女歌星應該好好珍惜呢段感情。
無綫早前遠赴芬蘭拍攝台慶特備節目《紀律精英怒雪狂奔》，主持人王合喜同黃卓玲重要親身落水玩遊戲，凍到兩個咿嘩鬼叫，雖然王合喜話晒都係運動高手，但一講到喺芬蘭落水，就真係乜嘢運動細胞都死晒，佢話自己上到水，個口凍到緊晒，講唔到嘢喎！
男子組合Boy'Z、Cookies嘅Miki、Theresa同埋王敏德，噚日出席喺港台舉行嘅《開心日報》活動，講吓自己有乜開心同唔開心嘅事，佢哋大多數都係講開心嘅事多。喺佢哋咁多個之中，Miki就最多緋聞，問到佢會唔會為咗緋聞而唔開心？Miki話：「之前都有㗎，因為好似影響好多人咁，不過𠵱家慣咗，就唔覺係一啲乜嘢，同埋我好快就唔記得啲唔開心嘅嘢。」如果Miki認同徐天佑拍拖，咁
吳彥祖同李嘉欣最近為咗部新戲《Miss杜十娘》不時出雙入對做宣傳，佢哋噚日接受商台訪問，問佢哋覺得對方有乜缺點？李嘉欣大讚吳彥祖說：「佢冇缺點喎，好完美，好純，同佢合作感覺好舒服。」而吳彥祖就梗係一樣有讚冇彈啦，佢話：「我以為李嘉欣咁靚，一定係好姿整，點知唔係，好易話為。」一對俊男美女不停互讚，真係有啲頂唔順。
張艾嘉、甄文達同MaggieQ演出畢國智導演嘅新片《海南雞飯》日前喺新加坡開鏡，呢部戲除咗成龍嘅電影公司有份投資外，新加坡電影委員會亦有出錢資助。呢部戲係講張艾嘉飾演嘅單親媽咪，除咗經營海南雞飯生意外，重要照顧三個仔，屋企重有一個法籍女交流生住喺度，呢位交流生重影響咗佢哋一家人嘅價值觀。呢部戲成本好低，睇嚟又係拍嚟參加影展。
爾冬陞、台灣演員范植偉同導演馬偉豪，噚日喺跑馬地出席活動，爾冬陞日前同圈外女友睇首映，但佢女友面對鏡頭左閃右避。爾冬陞嘅女友𠵱家已經冇做幼稚園教師，爾冬陞話：「養得起就養佢，我同女友打算明年結婚，但大家嘅家人都喺加拿大。」男人就話唔注重結婚形式，但女仔就會嬲你一世，所以應該擺酒廣宴親朋。
