日本女歌手hitomi雖然已經結咗婚，但身材依然正斗，最近佢獲邀成為日本著名健身雜誌《Tarzan》嘅封面人物，重向fans公開自己嘅keepfit秘密。
自言有啲儍嘅hitomi話，未入行嗰陣其實唔多了解自己嘅身體，佢連乜嘢係腹肌同背肌都唔知！但加入藝能界之後，佢大大話話已經做咗十年gym，起初hitomi主要靠跳健康舞嚟減肥，又做吓舉啞鈴呢啲肌肉運動，重以麥當娜（Madonna）嘅身形嚟做目標㖭。
hitomi成功收身之後，開始搵教練幫佢keepfit，呢四年嚟佢覺得自己嘅身形愈嚟愈sharp，形象更加硬朗。𠵱家hitomi唔再集中狂操自己嘅肌肉，而係一個星期只去做一次gym，放多啲時間喺全身運動方面，hitomi話：「我崇尚快樂主意，盡量避免太辛苦嘅訓練。」
hitomi亦特別留意自己嘅飲食同休息習慣，佢話：「朝早一定會食早餐，多數食烏冬或者係納豆白飯。午餐只係食麵包，而晚餐多數係西蘭花炒雞肉、豆腐同高蛋白質嘅食物。」hitomi重話自己每晚沖完涼，都會做柔軟體操㖭！