彭家麗是劉德華契女鄧肇欣的歌唱老師，近日彭家麗獲邀做功德林上海素食店的代言人，於是她便第一時間帶徒弟試菜，彭家麗推薦鄧肇欣試飲據聞有護聲功效的水果茶之餘，更與鄧肇欣一起學做齋菜，兩師徒可謂老友鬼鬼。
對於鄧肇欣這個徒弟，彭家麗讚口不絕說：「本身佢把聲比較薄，所以佢要集中練厚把聲，但有次聽佢唱過日本歌，覺得好有味道。」原來鄧肇欣學唱歌已經有三年時間，先後跟過三個老師，但就跟彭家麗最合拍。
鄧肇欣說：「我跟過好多唔同老師，每個教嘅方法都唔同，最舒服、最合拍嘅就係彭家麗，因為佢get到我要乜。」未知契爺劉德華可有教她唱歌？鄧肇欣說：「佢（劉德華）好忙，不過上次我錄影唱歌，佢都有喺度教我點樣唱得好啲。」
採訪、攝影：楊潔雯