喺娛樂圈想要紅，有時真係要講啲機緣，唔係可以強求嘅，但係有好多人，入咗呢行之後，即使明知紅唔起，都仍然堅持落去，就真係唔知為乜啦！
早前有個半紅不黑女星簽咗一間經理人公司後，因為得唔到公司重用，發展就梗係麻麻哋，唔好話要紅透半邊天，連兩餐都成問題，咁佢又要養家，結果公司就問佢有冇興趣識老細，搵番啲外快。
後來半紅不黑女星先知原來呢間公司好多女星都係靠咁樣搵錢，佢自知冇乜工作做，最後只好聽公司安排，聽聞呢間經理人公司只有玉女一個可以唔去呢啲老細飯局咋！
其實呢位半紅不黑女星人品都唔錯，只不過係生活迫人，佢條命都幾苦，之前佢跟一個老細，點知個老細係虐待狂，打到佢傷晒，結果佢走咗去一哥台一線花旦屋企暫住養傷，一線花旦照顧咗佢成個月，等面部傷勢好番，先至敢出番嚟見人。
徐若瑄噚日幫台灣一個電台做「第二屆創意隊呼大賽」嘅頒獎嘉賓，又唱又跳，面對台下一班熱情嘅阿兵哥，大家爭先恐後搶住要同徐若瑄合照、簽名，佢後來重俾人喺人群中抬起嚟，當場嚇到佢狂叫，但其實起初班阿兵哥見到佢唱歌冇乜反應，佢就扁晒嘴好嗲咁話：「你們是不是討厭我？」班阿兵哥先紛紛瘋狂起嚟，睇嚟男仔都係鍾意徐若瑄風騷同嗲多啲。
陳小春噚日喺灣仔行人天橋拍攝電影《墨斗先生》，吸引大批圍觀者，令到行人天橋水洩不通，電影公司重專登搵人疏導人群，但態度方面就比較差，不停喺街度話：「冇嘢睇呀，行喇！」當有fans攞起相機影相態度重差，直頭伸手去擋住鏡頭話：「呢度唔准影相。」話晒都係公眾場所，差人都冇你咁惡喇！
鄧肇欣噚日正日生日，公司呃佢話要去尖沙嘴同導演開會，點知去到現場，先至發現班影迷幫佢搞咗個生日會。話晒都係入行後第一個生日，有fans同自己慶祝當然開心，連佢契爺劉德華，亦送咗部最新款手提電話畀佢，搞到佢鬼咁興奮。喺活動上，班歌迷重同佢一齊整曲奇餅，幾咁溫馨呀！
樓茜妮噚日喺灣仔出席「寵物小精靈」歡樂派對，點知喺台上俾杜挺豪笑佢同比卡超一樣咁肥，問佢嬲唔嬲，佢話：「似比卡超都幾好呀，肥得嚟又可愛。其實我一直都有減，但我本身係肥底，而且我平時夜晚唔食嘢都瞓唔着，不過我都係肥喺上半身，下半身都唔肥。」其實身為女藝人keepfit係好重要，樓小姐應該注意吓啦。
黃凱芹噚日喺銅鑼灣出席「Transvital」活動，大會重頒咗個「全亞洲最具魅力型男」獎項畀佢，問到佢知唔知大會點解會揀佢，佢就話：「咁我都算保持得幾好，可能我嘅身形、樣貌同我嘅年紀唔成正比喇，係呢個原因都OK，我夠瞓嘅話二十歲左右喇，唔夠瞓就幾十咁樣。」照咁睇，佢自己都唔係好知乜嘢係型男喎！
