經紀陳噚日叫小初留意隻創業板股份泓迪應用環保（8143），重話唔好睇小呢隻股，因為有班猛人已經入咗局，稍後將有大搞作。
泓迪自從公布完成收購一間韓國公司，出現咗個新大股東後，股價連升兩日，噚日又升多13.6%，收0.15元，原來唔經唔覺已係52周新高。
不過，隻股成交實在太細，噚日成交股數只得865萬股，成交金額125萬元，點樣睇都唔似係大茶飯嘅格局。
經紀陳就話小初有所不知，重叫小初去查清楚新大股東同埋購入的韓國公司，就知人哋來頭勁。不過經紀陳亦話，近期隻股升得咁急，而今日公布嘅中期業績，睇嚟都係無謂憧憬一類，所以估計股價將有回吐，到時小初先至考慮玩唔玩。
另外，經紀黃早排提過，品質國際（243）或會配股。
品質近日受惠於阿仔樂依文股價喺美國勁升，品質股價升勢亦轉急，頻創今年新高，睇嚟距離批股之期不遠矣。
慕容小初