金管局噚日又接多1億美元沽盤，即係連續3日入市，共買入3億美元，反映港元仍然強勁，有外資流入。煲呔曾噚日亦喺立法會話，有3萬幾億元資金在香港市場流離浪蕩，四圍搵投資出路，所以一定要推出西九龍文藝區，讓資金有個歸宿云云。但唔知點解資金偏偏唔肯流入港股，如果有10%游資流入港股，相信港股要突破20000點亦非難事，重使乜喺12000水平浮沉，恒指噚日重跌破萬二關收市，收11971，跌32點，成交127.37億元。
華潤電力（836）以上限2.80元定價招股上市，早已被市場人士批評定價太高，因為PE高達33倍，相對於其他電力股明顯偏高。首日掛牌雖有大摩力托，仍要破底收場，收報2.75元，較招股價低1.79%，成交14.8億元。阿虎相信在股價穩定期過後，大摩不再力托，股價走勢可能繼續轉弱。從華潤電力首日掛牌表現看來，新股熱潮可能已告一段落，大家無謂對中國人壽存太大期望，如果可以執番10-20%利潤，都應該偷笑。
新海能源（342）證實會競投國內液化石油氣項目，股價隨即炒高17%至0.123元，噚日有兩手大手上板，涉及1.43億股，每股作價0.093元，據聞係有基金入貨。黑客話，據講新海今次收購項目會以現金同新股支付，有利股價炒高，而且發新股意味會引入新嘅有實力股東，聽聞係日本大財團，到時可能會為新海增添唔少炒作話題。雖然近期大市好似腳軟軟，但聽聞新海今次至少都要見0.20元水平，真係信不信由你。
阿 虎