政界高手煲呔曾，大風浪蟄伏避凶，呢兩日，阿董出咗國，唐唐同章章又互插互片，千呼萬喚之下，高手終於出招嘞。
西九龍文娛藝術區工程，煲呔哥遭到以矮仔陳為核心嘅地產商集團聯手輿論審判兼政治迫害，俾人抹黑為「搞文革」，噚日，煲呔哥以署理特首嘅身份，一言九鼎，掃完街，再表態掃場，堅持西九龍工程，只可以由單一發展商承建，並聲稱一定唔會變為一個附送二流藝術設施嘅地產項目，又話一開波，就有五百個職位，未來數年，有六千個職位，玩就玩，唔玩就散檔。
呢句說話一箭雙鵰，彈無虛發，不但大長公務員志氣，大滅地產商威風，亦顯示煲呔喺強敵當前，特區權威真空，獨力擔起頭家嘅強人本色。咁有性格，唔怪得橫遭阿董同土共嘅妒恨。
係囉，單一發展商點解唔得？第一，寡頭發展商單一殺起，建築風格，一統江山，唔會搞到七國咁亂，你負責一嚿歌劇院、一隻顏色，佢承建一塊博物館又起到另一隻款。我國賢君秦始皇，都識得書同文、車同軌，連結萬里長城，呢啲就係我國歷史上最早由單一發展商承包嘅偉大文明結晶，到今日都重舉世矚目，重有大導演張藝謀拍咗套《英雄》嚟大加讚揚。
香港雖然美其名有「多黨議會民主」，但個政府始終係一董獨大。委任特首，從來唔見有公開投標，特區政府亦冇畀各黨派聯合執政，自由黨負責工商科技，民主黨揸教育同運輸，民建聯主管搞勞工同公務員事務，香港事務全部由大隻江所屬意嘅阿董土共一條蟲承包，西九龍工程又點可以開一個壞嘅先例？
香港一有紛爭，身任政策研究小組頭子嘅漏口佳，又例必有嘢講，佢最近又開始冇乜點挺董，話喺7.1之後，西九龍事件、王見秋、教育資源大風暴等等，顯示阿董都重未擺脫到統治危機。
漏口佳幾時可以戒除「阿媽係女人」式嘅解畫大行動呢？佢係咪唔記得咗自己都係阿董隻船嘅其中一名水手，政府公信力低，佢呢個首席師爺要唔要問責？定係近排阿芝阿佐，係見到大學準備削資源，擔心大學嗰份教席，會隨時俾李國章整蠱鏟走埋，到時阿董一冧，三司十一局青蛙過河，佢就變咗兩頭唔到岸？
阿佳講嘢，突然間變得咁中性，顯示阿董呢個問責團隊，陣味燶燶哋。獨係煲呔狀態大勇，又會變為槍打出頭鳥格局。一班幼兒玩泥沙，香港亂到咁，唔怪得英國首相貝理雅對住腳步浮浮嘅阿董，鬼咁好笑容，心情靚到絕！
傳真︰2623-9278
電郵︰