內置7GameX400明挑N-Gage

𠵱家和弦彩芒手機隨便數埋都有幾十款，再Sell靚芒靚聲就已經Out到爆，最新賣點就係要打得，講緊嘅就係手機遊戲，睇吓N-Gage廣告幾咁「行」就知呢個市場幾緊要。所以最新到港嘅三星X400，都話要加入戰團，內置7個遊戲，等你日日打餐飽，再搭埋內置收音機，唔打機都一樣好多嘢玩！

記者：劉耀祥　攝影：林栢鈞　
ImageGirl：Kathy

X400PROFILE
制式：GSM900/1800/1900三頻
屏幕：（內芒）65,536色/TFT/128×160像素（外芒）單色/OLED/96×64像素
功能：GPRS、40和弦、WAP、收音機、EMS
備用時間：260-380小時
通話時間：3-5小時
體積：86×46×20.2mm
重量：90g

睇開三星幾款銀色手機，都開始有啲悶，早前E700首披藍色戰衣，已經贏得唔少用家青睞，所以今次X400就大玩Color外殼，繼續畀用家有新鮮感，與以往三星手機感覺截然不同。

又黃又橙玩搶眼
X400唔玩換殼，但係廠方就提供鮮黃色同鮮橙色，夠晒搶眼，不過暫時水貨只得藍色，據聞另外兩色要遲啲先到，想玩搶眼就要再等等。外形四四方方嘅X400，機身四角以圓角設計，所以手感相當唔錯，若果可以飛甩天線仔就更加好，90g嘅重量放落衫袋都唔多覺。雖然唔係雙彩芒，不過外芒亦用上OLED，睇時間及來電顯示都夠用，開價$2,980唔算太貴，通常新機始終都較為高企，相信仍有下調空間。

■OLED外芒顯示可基本資料，或者收音機頻道。

■方形機身唔算大，男女用家都啱手形。

星期一玩到星期日
唔玩影相、唔玩擰芒，今次X400硬闖近期手機新戰場——打機熱，由機外到機內都寫住大大個「GAME」字。話明主打玩GAME，三星傳統嘅65,536色靚芒及40和弦靚聲就點都唔少得。而且理所當然地支援JAVA，機內亦已經內置有7個遊戲，從智力到動作都有，一日玩一個都玩成個禮拜，可謂三星內置最多遊戲嘅手機。雖然內置多個遊戲，但係每次開啟JavaGame就差唔多成8秒先得，不過遊戲畫面及流暢度都合格，等耐少少都值得。為咗方便打機，X400鍵盤上更將2、4、6及8用唔同顏色做十字掣，一睇就知點控制。

■水貨暫時得藍色，黃色同橙色就要再等等。

■電池外形亦與以往不同，極具線條美。

■內置收音機，不過只可以一隻耳聽就略為失敗。

■數字鍵變成十字掣，打機更加方便。

■機面大大個「GAME」字，打機來電會有閃燈。

三星首次內置收音機
內置收音機係唔少人買手機時考慮嘅因素，但係市面可供選擇嘅機種唔多，不過𠵱家就可以多一個選擇，因為X400內置有FM收音機功能，乃三星首部在港發售的內置收音機手機，介面亦做得相當靚，接收都算唔錯，Search台話咁快就搞掂，但係最奇怪就係跟機只係普通單邊Handsfree，想聽立體聲就要自己諗諗計。除了收音機之外，X400亦強調機內設有3D畫面，玩落之後原來所謂嘅3D畫面就係功能選單，設有「NatureMode」及「CyberMode」，以自然圖案及科幻圖案為選單背景，水珠或機械都3D立體顯示，睇得出三星喺美術上落咗唔少功夫。

■遊戲畫面做得唔錯，睇吓呢個高爾夫球遊戲就知道。

■國際象棋AI反應算快，唔使等到頸都長。

查詢：23987320（鉑匯科技）
地址：九龍旺角先達廣場地下93號舖

■NatureMode及CyberMode提供不同風格選單，盡晒3D圖案。

■紅外線及音量掣設於機側，一貫三星設計。