唔講唔知，今年適逢係香港環宇汽車，代理日本三菱汽車嘅35周年大日子，為咗紀念呢個咁重要嘅時刻，代理商剛推出一個「環宇35周年誌慶優惠」大行動，三部全新三菱Colt頂級Sporty版，定價不過係3萬5千蚊咋！較原來11萬3千8蚊嘅售價，折讓咗成7萬8千8蚊咁多；車價咁吸引，自然唔少準買家大感興趣啦！為公平起見，由今日起至11月17日中午12時前，大家可以現金或個人支票1萬蚊嘅數額，到各三菱陳列室落訂，會否係幸運兒，能夠成為三菱Colt嘅新車主，咁就要睇吓嚟緊11月22日，三菱車展上嘅抽籤結果喇！之不過，抽唔中都唔使失望喎！事關亞Mark打探過，屆時落咗1萬蚊定金嘅客人，若想買其他三菱汽車型號，可以1萬蚊當2萬蚊用㗎！咁着數嘅優惠，就連亞Mark都心動啦！