專門調查顧客對商品滿意程度嘅國際顧問公司J.D.PowerAsiaPacific，最近就2003年全日本嘅輕自動車商品性評價調查（APEAL）公布咗調查結果。今年嘅調查於7月份進行，對象係由2002年12月開始，至2003年5月期間內，購買咗輕自動車（K-Car）新車嘅買家，並獲得2,298人回覆；調查則以八個主要元素，包括外形、引擎/傳動、便利性能、車廂表板/設備、音響、操控/乘坐舒適感、座位及冷氣系統等，共110個以上嘅項目向汽車用家查詢，並以1,000分為滿分。而是次調查中出現嘅車款，佔日本輕自動車市場超過95%，並有7大車廠共22個型號供評核。
響多個型號中，鈴木Lapin以690分高踞首位，響八大元素其中六項獲得頗高評分，並喺外形、車廂表板嘅元素上，遠遠拋離其他對手㖭！而第二及第三位則是同獲655分嘅三菱eKWagon及大發Move，第四位係鈴木MRWagon（646分）、第五位則由富士Pleo以640分奪得。同時，喺排行榜頭幾位嘅型號，每款都響外形及便利性能方面獲頗高評價；其中排首位嘅鈴木Lapin，無論外形及車廂配搭皆獲得頗高評分。第二位嘅三菱eKWagon，則為杯架設計、車身顏色有關嘅項目及造型得到讚賞，而大發Move則因其擁有敞大實用嘅車廂空間，獲得頗高評價。綜合以上各點，雖然參加評選嘅都屬於輕自動車，但顯示出車主喺買車時嘅着眼點及對車子嘅評價，都會各有不同。