盛傳係女同志嘅中谷美紀，唔知係咪為咗避傳媒，近排真係低調得好緊要，連佢啱啱出嗰本寫真集《光》都冇乜點宣傳，但我羅拉身邊嘅攝影師朋友，都大讚今次為寫真集操刀嘅高柳悟技術高超，即管買嚟當相集睇！
呢本喺日本石垣島同西表島取景嘅寫真集，果然拍到中谷鬼咁脫俗，雖然性感造型欠奉，但入面就有唔少被日本傳媒大讚嘅前衞構思，好似中谷着住金色懷舊泳衣，喺草地上面追住隻鴕鳥係咁跑，成個少女咁款，之後佢又着條鮮紅裙游水，邪啲講句，真係有啲似紅衣水鬼！
不過最令我羅拉印象深刻嘅，係相入面嘅中谷明顯好唔開心，表情頗為憂鬱，睇埋佢喺寫真集後面嘅留言，佢覺得自己已經「人間失格」，即係失去咗生存嘅能力喎！
可能中谷俾負面新聞壓得太辛苦，佢話：「生活喺都市嘅我一身污垢，支離破碎，咁多年嘅價值觀都崩潰晒，我𠵱家對任何小變化，都好敏感……」中谷重話對未來冇晒信心，好在咁靚嘅自然環境，令佢心情舒暢番啲咋！