如果估前排離婚嘅皇馬巴西球星卡洛斯，因傷缺席兩場世界盃外圍賽好唔開心嘅話，可能會大錯特錯，因為佢𠵱家可以名正言順同秘密女友金髮女郎安吉拉如膠似漆。
安吉拉最近向西班牙傳媒公開一啲同卡洛斯親暱嘅照片，令馬德里市球迷唔得閒理會皇馬其他五條煙，因為好可能就係呢個女人，令到卡洛斯同老婆分開。
卡洛斯仍未對呢單嘢有乜回應，但係單睇相片已經估到佢哋關係唔簡單，不過有人話安吉拉係男人都啱，博宣傳啫！
講開又講，話卡洛斯應該攞歐洲足球先生個獎嘅朗拿度，亦有消息證實會同老婆美蘭妮離婚，真係估唔到，呢兩個老死嘅婚姻路途會似到咁交關。
史特加今屆啲波咁醒，隊中射手古蘭爾功不可沒，不過原來佢年薪只得二十萬歐元（約一百八十萬港幣）。所謂人望高處，聽講史浩克04已用一百萬歐元利誘佢來屆加盟，即係人工多咗四倍。我求大俠就話咁嘅時勢有咁好嘅條件，去邊度搵？睇怕古蘭爾你都係走硬居多嘞。
所謂一沉百踩，好少話有雪中送炭，剛俾人炒咗嘅列斯領隊列特，終得到巴西後衞洛基祖利亞撐，佢話列特問題在於係唔夠時間做嘢，唔係冇料到。但如果大家知道洛基祖利亞係列特搵番嚟嘅借將，就知道佢係報番列特嘅知遇之恩，唔好俾人話佢老細俾人炒咗竟然粒聲唔出！
皇馬大敗畀西維爾後，教練基羅斯賽後有埋怨新仔後衞魯賓嘅意思，會長佩雷斯就話咁講嘢唔啱，重話皇馬上下都要負責；重話指魯賓係罪人大錯特錯，語氣都幾重。佩雷斯雖係生意人，但唔好恰佢唔識波，基羅斯嗰日搵魯賓打中堅就已經係敗筆，賴無可賴，抵俾會長轟！
愛華頓上屆由領隊莫耶斯領軍後耳目一新，但唔知係咪佢心雄咗，結果搵咗門將馬田；兩個中場麥法頓同基爾賓尼加盟後，重成日諗住攞埋富咸嗰件中場桑恩戴維斯，分晒心咁，忽略咗隊波，搞到「拖肥糖」喺英超跌到尾四。我求大俠覺得，佢唔好咁有野心，不變應萬變重會好啲喎。