沈振盈講股，以術數推算，明年甲申年，申屬金，利好金融，故此沈振盈最為看好銀行股，銀行股之中，當然以滙豐為首選啦。
呢日碰到賓架陳，問佢銀行生意如何？佢話：「上半年業績，你哋都知道晒啦，好好啫！」左丁山話：「問你下半年是否好好呀？」賓架陳答：「不是好好。」左丁山當堂窒咗一窒，賓架陳慢條斯理咁繼續講：「不是好好，是很很很很好。」很到幾乎連粗口都出埋！
咁就得啦，銀行下半年肯定賺到笑，問賓架陳：「買邊隻銀行股好？」佢雙眼一瞪：「當然係買大阿哥滙豐啦！」咦，咁講法，買滙豐只會買貴，唔會買錯，風險唔算大也。記得曹仁超講過，香港股神香植球生前最愛買地產股，非地產股之中，香大俠只肯買滙豐，我哋不妨學吓嘢。
滙豐過去咁多年來一帆風順，班蘇格蘭人實在係好嘢，帶領滙豐每次藉收購而擴大網絡，增加資產，每次都咁正，例如今年完成收購美國HouseholdInternational，談判之時，美國股市未完全反彈，美國經濟數據唔多理想，分析師好驚HI壞帳多，𠵱家呢？美國第三季增長百分之七點一，拍得住中國，最新失業數字改善咗好多，生產力大升，預料○四年GDP繼續維持上佳增長率，HI當堂掂晒，壞帳？乜嘢壞帳呀？只係益咗滙豐又試買入筍貨啫。經紀K認為HI有助於滙豐盈利增長，蘇格蘭人係得嘅；股東應該對呢班管理層有信心。