土瓜灣傲雲峰就嚟賣，今次以景觀為一大賣點，噚日發展商就特登搞咗個直升機睇樓活動，等大家可以喺空中睇吓個盤嘅外貌同規模。從高空可見，個盤附近主要係啲較矮嘅舊樓，估計有唔少單位有海景。不過，始終要到現樓先係最準確。
發展商賣樓，直升機睇樓似乎成為潮流，尤其係有番咁上下規模嘅樓盤，又確實要喺高空，先可以影到張靚相。之前嘅何文田君頤峰、尖沙嘴港景峯同東涌藍天海岸等，都搞過類似嘅活動。
據蘭西所知，租用直升機一啲都唔平，租用一個鐘大概要成一萬蚊，要招呼咁多間傳媒影相，使費都唔平。不過，為咗搞靚個樓盤嘅形象，花多少少都值回票價。
自從石禮謙離開土發公司後，除咗喺立法局見到佢之外，好少見佢出席發展商嘅場合。
生記置業嘅九龍城城南道10號單幢樓，今日開售，就請到佢嚟做嘉賓剪綵，認真畀面。據聞，石生同生記置業嘅董事吳國勝同樣都係獅子會成員，交情頗深，先至請到佢光臨。
講起石禮謙，諗起近排再遭評擊嘅西九龍文娛藝術區。
矛頭當然離唔開指摘項目過份龐大，兼借搞藝術為名，搞地產項目為實，煲呔曾又再捱批。
身為立法會地產及建造界議員嘅石禮謙，就忿忿不平話，呢個項目咁大，中小型發展商好難參與，又係俾資金充裕嘅大型發展商玩晒。雖然今日唔係立法會場合，但唔知佢有冇最新意見發表呢？
香港人鍾意飲飲食食，又鍾意試新嘢，近年市場最興就係食私房菜，一向識飲識食嘅利嘉閣董事總經理何紹章，就同《星島》合作，搞咗本「利嘉閣品味全港私房菜」嘅書，用咗十五萬，印咗三千本，分畀分行，由同事送畀啲豪宅客戶。
呢本書介紹超過二百間私房菜，對飲食講究嘅豪宅客，可以揸住本書逐間慢慢試。之前利嘉閣都出過一本講豪宅嘅書送畀啲客，聽講遲啲重會出其他相關嘅書。衣食住行乜都照顧到。
銀主盤好多時都係投資者嘅入市目標，但係一般租金回報率大約六七厘左右。最近有個投資者買咗個銀主單位，回報率估計逾十厘，聽落好吸引。
呢個單位係鴨脷洲大街仁正大廈低層D室，面積三百九十三方呎，成交價五十二萬，每方呎一千三百二十三蚊，比市價低逾一成。
中原地產分行經理李斌話，物業雖然有十八年，但係大堂啱啱翻新完，佢估計單位可租到四千五百蚊，計落回報率有十厘四。
柴灣工業城數月前有間則師樓斥三百八十八萬，連車位買入一個高層九千四百零三方呎單位，買家跟手向政府申請轉做寫字樓，最近獲批出補地價，每方呎一百零六蚊，則師樓接受補價，計埋買入價每呎都係五百蚊多啲。
聽講個單位曾有買家出價四百四十萬洽購，則師樓因覺得補價合理，所以拒絕出售，而個客就轉去買咗同區嘅森龍工業大廈低層全層。
中原工商部經理蔡榮祥話，最近柴灣工業城都有部份業主查詢將單位轉做寫字樓，個別重係全層。佢估計區內工廈轉寫字樓個案會漸多。𠵱家物業嘅放盤數量唔算多，以千幾呎單位為主，叫價一般為每方呎四百到四百五十蚊。
蘭西
電郵地址：
