李鵬飛月底搬寫字樓，由中環搬返去尖東新東海大廈，飛哥笑話其實係搬回老地方，佢十幾二十年前間寫字樓就喺尖沙嘴中心，嗰陣飛哥由於身兼多職，唔夠時間做嘢，所以好勤力，朝朝六點九就返到寫字樓。
但原來唔只佢一個咁早，信和老細黃志祥亦都大清早就開工，唔怪得周街都話黃生嘅工唔易打。
飛哥話，將華經顧問公司搬過海，主要係老婆大人送佢一個辦公室，唔使佢由沙田去中環咁辛苦。飛嫂又好有眼光，尖東𠵱家立立亂啫，第日有埋鐵路，就好唔同。
一講起飛嫂，飛哥就讚不絕口，話要多謝個老婆教得啲仔女咁好，𠵱家個女嫁咗人，兩個仔都拍緊拖啩，兩夫婦就等緊通知幾時做老爺奶奶。
飛哥個大仔喺美國從事銀行界，二仔喺香港做建築，兩個都做得好好，八方聽到飛哥愈講愈開心，都為佢高興，父慈子孝，喺電台得閒就潤吓老董，呢啲就叫做享晚福嘞。
（圖）飛嫂送咗間尖東寫字樓畀老公，等飛哥返工唔使由沙田去中環咁遠水路。
傳真︰2623-9278
電郵︰