上周提及利民實業（229）終於落實配股，配股價重出現溢價。隻股噚日復牌，股價表現極之硬淨，逆市上升5%，收2.60元。經紀黃話，由於利民有大行助陣，後市仍然可以睇高一線。
利民今次以先舊後新方式配股，配售6280萬股，每股作價2.50元，大股東亦趁機減持十幾個巴仙股份。
噚日成交股數6759萬股，減去上板配售股份6280萬股，實際成交股數只有479萬股。
經紀黃話，為利民配股的歐資大行，向來配售工業股都有一手，今次夠膽以溢價配股，當然係有足夠信心，而佢哋嘅芬佬客戶亦係以長線為主。
經紀黃又話，呢間歐資行之前配售嘅林麥（915）、泰興（389）同埋冠華（539）等，除咗冠華因為棉花價格上升，跟隨大部份紡織股下滑之外，其他股份嘅股價都叫做守得住，其中泰興重久唔久創新高。
聽聞利民唔會配完股就算數，稍後仍會與證券界繼續保持聯繫，提供足夠透明度。
慕容小初