恒指散153點，期指瀉222點，低水65點。傳統智慧係低水代表個市向下望，但好多時傳統智慧係錯嘅。恒指12000失而復得，若果美國個市定得番，港股又有機會推番上去。
是日龍頭威水輪係中移動Put輪9758，由3.9仙升上4.9仙，彈幅26%，有22球成交，有1百萬銀掟落去賭。隻輪剩番3個幾星期可以賭，行使價20元，溢價9.3%，槓桿率43.9倍。正股（941）過去兩日唔見80仙，再跌機會唔係冇，不過要喺3個星期內再跌2元（跌2元，揸隻輪先至唔使輸），唔多實際，所以隻輪賭唔過。
正股上月24日最低21.20元（跟住三兩吓手勢上到23.35元），昨日最低21.30元，然後收21.50元，可能代表短期見底有反彈之機，可以吼吓啲Call輪，想贏輸快趣見功嘅有9116，略為價外，明年4月到期，輪價18.5仙，溢價12.7%，槓桿率11.6倍。揀短期輪9861，則勝在溢價低，1個月後夠鐘，輪價36.5仙，溢價0.7%，槓桿率5.9倍。
威水輪有隻和黃Put輪9927，收10仙，升19%。明年2月初到期，溢價16.6%，槓桿率58.8倍。短期波動反映正股上落，但期望正股兩個幾月內再跌10元以上亦係唔實際，最好咪手多。
章盛