大盤細盤都希望趁近排樓市氣氛唔錯，快手開賣，以便喺年底前作最後衝刺。地產代理自然做相應部署，例如美聯物業，集團喺土瓜灣嘅傲雲峰專舖，噚日搞開張，執行董事張錦成話，呢間係集團第二百零七間分行，集團人手已增至三千三百人，比九七年樓市高峯期時候重要多。
年底前大堆新盤魚貫推出，淨係九龍區，除咗重推嘅傲雲峰，重有新地嘅油麻地窩打老道8號，同埋恒隆嘅何文田君逸山，淨係呢三個盤就提供超過二千五百伙。
美聯羅國安話，佢哋已做定部署，九龍區嘅人手由今年四月嘅四百五十人，增加到𠵱家嘅五百三十人，重計劃短期內增添人手至六百人，實行打人海戰術咁話。至於分行陣容，𠵱家九龍有三十四間，配合擴充，希望加到四十間。
高爾夫球運動趨平民化，稍有規模嘅屋苑，都設有推桿場或者電腦模擬練習室，好似西灣河逸濤灣（圖二）更加兩樣兼備。
逸濤灣業主日後可能有個更好嘅選擇，因政府準備明年將屋苑隔籬幅地會改造成高爾夫球練習場，地皮超過十一萬方呎，原本做公園，可能政府見時下咁多人鍾意打GOLF，所以暫時轉一轉形式，初步租期兩年，之後按季續租。
長實廣告部高級經理袁添鴻初次由幕後走到幕前，噚日終於喺首次負責嘅元朗四季雅苑記者會亮相，介紹物業嘅規劃。
因為係首個記者會，佢做足功課先出嚟會見傳媒。佢早排重坐小型飛機視察物業規模。四季雅苑今次走高檔路線，以法國南部做主題，淨係裝飾用咗三千萬，加咗啲例如法式花籃燈柱、花圃同坐椅，營造出法國風情。
該盤準備下個月賣，意向呎價超過三千元。準備年底前推出三分一。
蘭西
電郵地址：
