最近大部份時間困在家中寫劇本，每次都一樣，只要是在寫劇本，身邊的一切，除了劇本外，都顯得特別的有趣，尤其是電視特別好看。
早上起床，咦？重播《新紮師兄》，中學時代的偉仔尚未動用那雙電眼，很活潑地用身體語言及大大聲講嘢，瘦猛猛的青雲、周身肉行起嚟彈彈吓的曼玉、面上有嬰兒肥的嘉玲、天生一副明星相的黃造時；大批演技精湛的綠葉：潘宏彬、戴志偉、呂方、黃宗賜、關禮傑、羅蘭、蘇杏璇、劉紹銘，還有我最喜愛的「舅父東」——許紹雄。吃完午餐，飯氣攻心，小睡片刻，醒來時已差不多要看《西關大少》，劉松仁是我非常喜歡的演員，有松哥跟趙雅芝作定海神針，張智霖與佘詩曼兩位年輕人可放心地馳騁於《流星花園》式的愛情。
接下來還有《衝上雲霄》，製作條件比很多電影還要好，實實淨淨成日見到真飛機，靚仔靚女着制服幾時都咁好睇，鎮宇做機師，個頭梗係企理啲好，於是兩邊剷青，但成日企喺跑道，咁大風冇嘢飄飄吓又唔似樣，於是頭頂留長髮，呢個應該就係《衝上雲霄》頭。
結果係成日睇電視，劇本每日寫唔夠一場，死火！